Икки кундирки, футбол оламини ларзага солган бу янгилик футбол мутахассислари, мураббийлар, футболчилар, оддий мухлислар муҳокамасида. УЕФА Суперлига тузилишини қабул қилмаслигини, бу мусобақада ўйнайдиган футболчилар Европа ва жаҳон миқёсидаги турнирлардан дисквалификация қилиниши мумкинлигини маълум қилди.
Шунингдек, ФИФА ҳам Европанинг топ-клублари томонидан ташкил этилган Суперлигага қарши эканлигини билдирди.
Германиялик мутахассис, “Ливерпуль” бош мураббийи Юрген Клопп янги ташкил этилган Суперлига ҳақида салбий фикр айтди.
“Суперлигага бўлган муносабатим ўзгармади. Бу ҳақда биринчи марта кеча эшитдим. Биз жуда кам маълумот олдик. Асосан газеталардан ўқиб билдик.
Бу қийин. Кўпчилик норози, тушунаман. Менга бошқа нарса дейиш қийин, чунки мен ва футболчилар баҳслашиш жараёнида қатнашмаяпмиз. Биз бу ҳақда ҳеч нарса билмасдик. Келинг, бу қаерга олиб боришини кўрамиз.
Мен учун Чемпионлар лигасининг ўзи Суперлига. Биз бу турнирда турли хил кучли жамоаларга қарши ўйнаймиз. Нега “Ливерпуль” кетма-кет ўн йил “Реал”га қарши ўйнайдиган тизимни яратишимиз керак, уни ким томоша қилади?”, – деди Клопп.
