Ўзбекистоннинг Вашингтондаги элчиси Жавлон Ваҳобов АҚШнинг диний эркинлик соҳасидаги махсус топшириқлар бўйича элчиси Сэм Браунбэк билан музокаралар олиб борди, дея хабар қилади “Дунё” АА мухбири.
Ўзбекистон элчихонасининг хабар беришича, Давлат департаментининг вакили мамлакатимизда диний ташкилотларни рўйхатдан ўтказиш тартибини соддалаштириш бўйича қонунчиликни такомиллаштириш борасида кўрилаётган чора-тадбирларни, шунингдек, халқаро экспертлар билан биргаликда “Виждон эркинлиги ва диний ташкилотлар тўғрисида” янги қонун лойиҳасини ишлаб чиқиш ҳақидаги ҳаракатларни олқишлади.
- Ўзбекистон томонидан қўйилаётган ижодий қадамлар, жумладан, болалар қариндошлари билан масжидга боришлари мумкинлиги ҳақидаги оммавий эълонни эшитиб, жуда хурсанд бўлдим,- деди Сэм Браунбэк. – Биз келгуси қадамлар диний эркинлик ва диний сабабларга кўра қамалган маҳбусларни озод қилиш тўғрисидаги қонун лойиҳаси қайта кўриб чиқилиши билан боғлиқ бўлишини кутмоқдамиз.
Элчихонанинг маълум қилишича, 16 ноябрь куни диний эркинликлар бўйича навбатдаги вазирлар конференцияси Польша пойтахти Варшавада ўтказилиши режалаштирилган.
Элчи Сэм Браунбэк Ўзбекистон делегациясининг халқаро конференцияда иштирок этишга ва “диний эркинликни очиқ ва инклюзив жамиятда тарғиб қилиш модели” намойиш қилинишига умид билдирди.
Эслатиб ўтамиз, Ўзбекистон делегациси ташқи ишлар вазири даражасида 2018 ва 2019 йилларда Вашингтонда бўлиб ўтган иккита конференцияда иштирок этган.
2018 йилда АҚШ Давлат департаменти Ўзбекистонни “диний эркинликлар билан боғлиқ алоҳида хавотирли давлатлар” рўйхатидан олиб ташлади. Жорий йилнинг июнь ойида диний эркинлик тўғрисидаги навбатдаги маърузани эълон қилиш пайтида АҚШ Давлат котиби Майкл Помпео Ўзбекистонни ривожланиб бораётган давлатлар қаторида алоҳида таъкидлаб, ушбу мамлакат диний эркинликлар билан боғлиқ вазиятни яхшилаш учун жиддий қадамлар қўйишда давом этаётганини айтиб ўтган эди.
