Таъкидлаш жоиз, Республика банк тизимини ислоҳ қилиш Стратегиясига асосан «Агробанк» АТБ фаолиятини кичик ва ўрта бизнесни, қишлоқ хўжалигидаги ишлаб чиқарувчиларни давлат томонидан кредит орқали қўллаб-қувватлаш, ҳудудларда жисмоний шахсларга хизмат кўрсатиш ва кичик тадбиркорлик субъектларини молиявий қўллаб-қувватлашга йўналтириш белгиланган. Муассаса мана шу мақсадларга эришиш учун қатор янги дастурларни амалга оширмоқда.
Бугунги кунда банк экотизими таркибида қуйидаги йўналишлар мавжуд:
Chakana.uz онлайн савдо майдонида смартфонлар, компьютерлар, офис ва маиший техниканинг кенг ассортименти таклиф этилади. Бу ерда мижозлар кредитни бир неча дақиқада расмийлаштириши мумкин.
«Фермерлар мактаби» – чорвачилик ва паррандачилик, сабзавотчилик, боғдорчилик, молия ва ҳуқуқий саводхонлик йўналишлари бўйича назарий ва амалий билимларни берувчи ўқув лойиҳаси бўлиб, илк фермерлар мактабини 150 нафар ёш тамомлади.
«Agrobooks» – қишлоқ хўжалиги йўналишида фаолият юритаётган фермер ва тадбиркорлар учун мўлжалланган услубий қўлланмалар жамланмаси бўлиб, Агробанк веб-сайтида ҳам жойлаштирилган.
«Смарт-офис» орқали эса мижозлар автоматлаштирилган тарзда ўз–ўзига хизмат кўрсатади.
Қишлоқ хўжалиги маҳсулотлари ва хизматларини сотиб олиш ҳамда сотиш платформаси — «AgroZamin» ҳам барча учун кенг имкониятлар яратади. Электрон дастурга фермерлар ўз маҳсулотларини жойлаштириб, ҳамкорлар, етказиб берувчилар ва харидорларни топади.
Шунингдек, Юридик шахслар учун лизинг хизматларини — «Agro Finance Leasing», қимматли қоғозлар бозорида барча турдаги хизматларни тақдим этадиган — «Leader Finance» брокерлик компанияси ва «AgroLab» – ўсимликларни ҳимоя қилиш биолабораторияси ҳам самарали фаолият юритиб келмоқда.
— Сўнгги йилларда банкимиз капитали 12 баробарга ўсиб, ресурсларни жалб қилиш, кредитлаш имкониятлари кенгайди, — дейди Агробанкнинг бошқарув раиси Рустам Маматқулов. — Давлатимиз томонидан юритилаётган очиқлик сиёсати, иқтисодиётга берилаётган эркинлик, қолаверса, рақобатнинг кучайиши банкларда трансформация жараёнини тезлаштирмоқда. Кўпчилик Агробанкни қишлоқ хўжалигини молиялаштирадиган банк деб ўйлайди. Энди янги стратегияга асосан бизнес йўналишида ҳам замонавий фаолият олиб борамиз. Бу учун янги экотизм ва дастурларни ишлаб чиқдик.
Феруза Жўраева.
