Зидан Франция терма жамоаси тарихидаги 18-бош мураббий. Унинг шартномаси тўрт йилга, 2030 йилги Жаҳон чемпионатига қадар амал қилади. У расман 1 августдан иш бошлайди. Зиданнинг мураббийлар штаби сентябрь ойининг бошида эълон қилинади. Франция терма жамоаси Зидан бошчилигидаги биринчи ўйинини 25 сентябрь куни Миллатлар лигаси гуруҳ босқичининг биринчи турида Туркияга қарши сафарда ўтказади, деб хабар берди ria.ru.
“Мен кўп айтганман: Франция терма жамоасидан каттароқ ҳеч нарса йўқ. Шунинг учун, бу жамоанинг бош мураббийи бўлиш мен учун катта қувонч ва, албатта, катта фахр. Бу катта масъулият ҳам. Мен FFF президенти Филипп Диалло, ижроия қўмита ва Франция футбол Федерациясига ишончлари учун миннатдорчилик билдирмоқчиман, шунингдек, Дидье ва унинг штабининг ўн тўрт йиллик меҳнатига ҳам ҳурмат бажо келтираман. Бугун мен барча мураббийларим ҳақида ҳам ўйлаяпман. Шубҳасиз, Франция терма жамоаси учун катта амбицияларим бор!”, деди Зидан.
Зидан 2012 йилдан бери Франция терма жамоасини бошқарган ва 2026 йилги Жаҳон чемпионатидан кейин ишини якунлаган ватандоши Дидье Дешамнинг ўрнини эгаллади. Унинг раҳбарлигида “уч ранглилар” Жаҳон чемпиони (2018) ва Жаҳон чемпионати (2022) ва Европа чемпионатларида (2016) кумуш медал соҳибига айланди. Футболчи сифатида Зидан ва Дешам Франция терма жамоасида 1998 йилги Жаҳон чемпионати ва 2000 йилги Европа чемпионатларида олтин медалларни қўлга киритишди.
Зидан “Реал Мадрид”ни икки марта (2016-2018, 2019-2021) бошқарган, уч марта Чемпионлар Лигасида, шунингдек, Испания чемпионатида, Испания Суперкубогида, УEФА Суперкубогида ва Клублар ўртасидаги Жаҳон чемпионатида икки мартадан ғолиб чиққан.
