Бо рушди ҷомеа талаботи мардум низ зиёд мешаванд ва ниёзҳои нав ба сохтмон ва фароҳам овардани шароити замонавӣ пайдо мегарданд.

Бозори деҳқонии Юнусобод дар шаҳри Тошканд ҳамеша пурҷӯшу хурӯш аст, аммо тавсеаи минбаъдаи он бо сабаби норасоии ҷой мушкил мебошад. Илова бар ин, ҳаракат дар кӯчаҳои ҳамшафат хеле сербор аст. Аз ин рӯ, қарор шуд, ки бозор бо консепсияи замонавӣ — «ба баландӣ» рушд дода, майдонҳои савдо зиёд ва инфрасохтор беҳтар карда шаванд.

Мутобиқи лоиҳа, дар ҷойи бозори мавҷуда экобозори сеошёна бо нигоҳ доштани намуди анъанавии он сохта мешавад. Дар наздикии он маркази савдои иловагӣ ва хонаи заргарӣ ҷойгир мегарданд. Аз ҳама муҳимаш он аст, ки дар зери биноҳо таваққуфгоҳи зеризаминӣ барои зиёда аз ҳазор мошин ташкил мешавад. Лоиҳа 4–5 ҳазор ҷойи нави корӣ фароҳам меорад. Президент ба шахсони масъул супориш дод, ки сохтмонро ба марҳилаҳо ташкил кунанд, то ки бозор дар реҷаи муқаррарӣ фаъолият кунад.

Лоиҳаи навбатӣ ба ободонии боғҳо ва ташкил намудани минтақаҳои нави истироҳатӣ марбут аст. Дар боғи Абдулло Қодирӣ, воқеъ дар шаҳри Тошканд, ба нақша гирифта шудааст, ки майдони сабзкориҳо васеъ карда, релефи маҳал самаранок истифода бурда, минтақаҳои сайру гашт, фаввораҳо, планетарияи нав ва гастро-холл барои ҷалби сайёҳон ташкил карда шаванд. Иншооти нав ба маҷмааи бозори Чорсу ва умуман ба Шаҳри кӯҳна мутобиқ карда мешаванд.

Президент аҳамияти беҳтар кардани шароит дар боғ ва инъикоси анъанаҳои миллиро таъкид намуд.

— Нақшаҳо хубанд, аммо бояд ранги миллиро бештар илова кард. Дар ин ҷо инъикос додани таърихи шаҳр ва анъанаҳои халқи мо муҳим аст. Ҳар як шахс, новобаста аз синну сол, бояд дар боғ ҷои писандидаи худро пайдо кунад, — гуфт Шавкат Мирзиёев.

Боғи «Дӯстлик» низ навсозӣ мешавад ва ба як ҷойи муосири истироҳат табдил хоҳад ёфт. Роҳҳои пиёдагард, ҳавзҳо ва минтақаҳои истироҳатӣ аз нав сохта мешаванд, курсиҳои нав насб карда мешаванд. Минтақаи фароғатии оилавӣ, маркази эҷодиёти кӯдакон, майдони скейт, авиарий ва чархпалак ташкил карда мешаванд.

Дар ҳудуди боғ Кумитаи муносибатҳои байни миллатҳо ва робитаҳои дӯстона бо кишварҳои хориҷӣ ҷойгир аст. Дар майдони наздик ба он павилонҳои марказҳои фарҳангии миллӣ сохта мешаванд. Ҳар як павилон бо услубе сохта мешавад, ки фарҳанг ва анъанаҳои хоси миллатеро, ки намояндагӣ мекунад, инъикос намояд. Павилонҳо маҷмааи боғи «Дӯстлик»-ро зеботар мекунанд.

Бо ташаббуси Президент соли 2019 дар Тошканд боғи «Наврӯз» таъсис дода шуд, ки имрӯз яке аз ҷойҳои маъруф ва ободтарини маркази шаҳр мебошад. Барои густариши имкониятҳои ин боғ сохтмони меҳмонхона, маҷмааи варзишии пӯшида, тарабхона ва толори конфронс ба нақша гирифта шудааст.

Дар доираи рушди ҳамаҷонибаи минтақаҳо дар саросари кишвар маҳаллаҳои нав, боғҳо ва минтақаҳои истироҳатӣ сохта мешаванд. Аз ҷумла, дар шаҳрҳои Нурафшон ва Намангон боғҳои «Янги Ӯзбекистон» бунёд карда шуданд. Лоиҳаҳои оянда ба баланд бардоштани самаранокии онҳо ва ҷалби шумораи бештари меҳмонон равона шудаанд.

Дар наздикии боғҳои «Янги Ӯзбекистон» дар Нурафшон ва Намангон марказҳои сайёҳӣ бо бозори шарқӣ, минтақаҳои ҳунармандӣ, амфитеатр, фаввораҳо ва дигар иншоот ташкил карда мешаванд. Майдони сабзкориҳо тавассути шинондани дарахтони нав васеъ карда мешавад.

Президент дастур дод, ки сифати баланди татбиқи ин лоиҳаҳо таъмин карда, шароити бароҳат барои сокинон ва сайёҳон фароҳам оварда шавад.