Арбоби бузурги давлатӣ ва сарлашкар Амир Темур – бунёдкори давраи Эҳёи Дуюм, Ренессанси Темуриён дар рушду инкишофи давлатдории миллии мо ва тамоми таърихи ҷаҳонӣ ҷойгоҳи хосса дорад.

Дар солҳои истиқлолият адолати таърихӣ нисбат ба номи неку ёди ин шахсияти барҷаста, ки аз ҷониби низоми тоталитарии гузашта мазаммат мегардид, барқарор карда шуд. Симои Соҳибқирон Амир Темур ба рамзи давлатдории миллӣ табдил ёфта, дар раванди эҳёи худшиносӣ, анъанаҳо ва арзишҳои миллӣ барои мардуми мо ҳамчун манбаи қувваи маънавӣ хидмат мекунад.

Дар шаҳрҳои Тошканд, Самарқанд ва Шаҳрисабз муҷассамаҳои ин ниёи бузурги мо барпо гардидаанд, Осорхонаи давлатии таърихи Темуриён ва Бунёди байналмилаии ҷамъиятӣ фаъолият мекунанд, ордени «Амир Темур» таъсис ёфтааст ва бисёр кӯчаҳо ва гулгаштҳои кишвар ба номи ӯ гузошта шудаанд.

Имрӯз, вақте ки кишвари мо ба марҳалаи нави рушди миллӣ – Ренессанси Сеюм ворид шуда, дар ҳамаи соҳаҳо ислоҳоти амиқу бунёдӣ амалӣ мегардад, бо мақсади таҳқиқи ҳамаҷониба ва тарғиби густурдаи шахсияти Соҳибқирон Амир Темур дар ҷумҳурӣ ва хориҷи кишвар, нақши ӯ дар таърихи башарият ва тамаддуни Турон, инчунин мероси ғанӣ ва нодири Темуриён қарор мекунам:

I. Мақсад

1. Мақсади асосии ин қарор ба сатҳи сифатан нав бардоштани фаъолияти ташкиливу амалии илмӣ ва маърифатӣ бо назардошти аҳамияти миллӣ ва умумибашарии давраи Эҳёи Дуюм, ки онро ниёи бузурги мо бунёд гузоштааст, ҳамчунин нақши бузурги ин давра дар тарбияи насли ҷавон ҳамчун созандагони Ӯзбекистони Нав мебошад.

II. Чораҳои ташкиливу амалӣ

2. Пешниҳодҳои Академияи илмҳо, Маркази тамаддуни исломӣ дар Ӯзбекистон, Вазорати таҳсилоти олӣ, илм ва инноватсия, Вазорати фарҳанг, Вазорати мудофиа, Маркази ҷумҳуриявии маънавиёт ва маърифат, Бунёди байналмилалии ҷамъиятии Амир Темур, ки инҳоро пешбинӣ мекунад, тасдиқ карда шавад:

а) таҷлили густардаи 690-солагии рӯзи таваллуди Соҳибқирон Амир Темур дар соли ҷорӣ;

б) ҳар сол моҳи апрелро моҳи Амир Темур эълон намуда ва дар чорчӯби он баргузор кардани вохӯриҳо ва чорабиниҳои ҳунарӣ-маърифатӣ дар мактабҳои таҳсилоти умумӣ, муассисаҳои миёнаи махсус, касбӣ ва таҳсилоти олӣ, қисмҳои ҳарбӣ ва муассисаҳои ҳарбӣ-омӯзишӣ, инчунин дар корхонаҳо, ташкилотҳо ва маҳаллаҳо бо иштироки олимони темуршинос, нависандагон ва аҳли санъат.

3. «Харитаи роҳ» оид ба омӯзиши мунтазами таърихи давраи Темуриён ва тарғиби густурдаи натиҷаҳои илмӣ то соли 2030 мувофиқи замимаи № 1 тасдиқ карда шавад, ки инҳоро дар бар мегирад:

а) 9–10 апрели соли 2026 дар Маркази тамаддуни исломӣ дар Ӯзбекистон баргузор кардани Конфронси байналмилалии илмӣ дар мавзӯи

«Нақш ва аҳамияти Амир Темур ва тамаддуни Темуриён дар таърих ва фарҳанги ҷаҳонӣ»;

б) омода ва нашр намудани силсилаи китобҳо, асарҳои илмӣ ва илмӣ-оммавӣ, бахшида ба таърихи давраи Амир Темур ва Темуриён, аз ҷумла:

i) нашри асари «Темур тузуклари» («Уложения Темура») бо матни тавзеҳоти илмӣ ба забонҳои форсӣ, арабӣ, чинӣ, англисӣ, фаронсавӣ, испанӣ ва русӣ;

(ii) таҳия ва нашри китоб-албомҳои «Темурийлар даврининг 100 нодир қўлёзмаси» («100 дастнависҳои нодири давраи Темуриён») ва «Темурийлар даврининг 100 нодир дурдонаси» («100 дурдонаи нодири ҳунарии давраи Темуриён»);

в) ташкил намудани кор оид ба овардани нусхаҳои сарчашмаҳои хаттии аслии давраи Темуриён, ки дар кишварҳои хориҷӣ нигоҳ дошта мешаванд, ба Ӯзбекистон;

г) намоиши филмҳои таърихиву бадеӣ ва ҳуҷҷатӣ, ки дар асоси  лоиҳаи «Тирик тарих» («Таърихи зинда») наворбардорӣ шудаанд ва равобити дипломатӣ ва сафоратии империяи Амир Темурро бо давлатҳои Аврупо инъикос мекунанд, дар кишварҳои Испания, Фаронса, Британияи Кабир;

д) таъсиси платформаи электронии сарчашмаҳои давраи Темуриён.

4. Ба Маркази тамаддуни исломӣ дар Ӯзбекистон супурда шавад, ки якҷоя бо Академияи илмҳо, Маркази ҷумҳуриявии маънавиёт ва маърифат, Вазорати корҳои хориҷӣ бо мақсади тарғиби васеи саҳми Амир Темур ва Темуриён дар рушди тамаддуни ҷаҳонӣ, аз 1 марти соли 2026 дар кишварҳои хориҷӣ презентатсияҳо, чорабиниҳои медиявӣ ва конференсияҳо дар мавзӯи «Таърих ва мероси фарҳангии Темуриёни бузург»-ро барои таъмини ҷорӣ кардани истилоҳи «Темуриёни Бузург» ҳамчун истилоҳи илмии байналмилалӣ баргузор намоянд.

5. Таркиби Кумитаи ташкилии омодагӣ ва баргузории чорабиниҳо бахшида ба 690-солагии рӯзи таваллуди Соҳибқирон Амир Темур (минбаъд – Кумитаи ташкилӣ) мувофиқи замимаи № 2 тасдиқ карда шавад.

6. Комитети ташкилӣ (Арипов А.):

а) ҳамоҳангсозии фаъолияти идораҳо ва ташкилотҳои давлатиро, ки масъули баргузории чорабиниҳо бахшида ба 690-солагии рӯзи таваллуди Соҳибқирон Амир Темур (минбаъд – чорабинӣ) мебошанд, амалӣ намояд ва масъалаҳои ташкилиро сари вақт ҳал намояд;

б) корҳои ободонии ҷойҳои баргузории чорабиниҳо, муҷаҳҳазсозии онҳоро бо таҷҳизоти техникӣ ва телекоммуникатсионӣ таъмин намояд;

в) офаридани силсилаи маркҳои почтавӣ ва лифофаҳо, тақвимҳо ва васоити иттилоотии намоишӣ, инчунин ба муомилот баровардани тангаҳои ҷашнии ёдбудии нуқра ва тиллоро, бахшида ба 690-солагии рӯзи таваллуди Соҳибқирон Амир Темур таъмин намояд;

г) масъалаҳои ба Ӯзбекистон омадан ва бозгашти меҳмонони хориҷӣ, ки дар чорабиниҳо иштирок мекунанд,  расмиёти додани раводид, хидматрасонии нақлиётӣ ва тиббиро ҳамоҳанг созад;

д) омодагии иншоот ва захираҳои меҳмонхонаҳоро дар минтақаҳои баргузории чорабиниҳо таъми н намояд.

7. Ба ҳокимияти шаҳри Тошканд супурда шавад, ки то охири соли 2026 бо истифода аз манбаъҳои иловагии буҷети маҳаллии шаҳри Тошканд корҳои бозсозии бинои Осорхонаи давлатии таърихи Темуриён, муҷаҳҳазсозӣ, рақамисозӣ ва таъсиси экспозитсияи нави онро бо истифодаи таҷрибаи пешрафтаи маъруфтарин осорхонаҳои ҷаҳон анҷом диҳад.

III. Ташкил, таъмин ва назорати иҷрои қарор

8. Вазорати корҳои хориҷӣ мутобиқи дархостҳои Академияи илмҳо расмигардонии раводиди вуруд ба Ҷумҳурии Ӯзбекистонро барои иштирокчиёни хориҷии чорабиниҳо тибқи тартиби муқарраргардида, бидуни гирифтани пардохтҳои консулгарӣ ва дигар боҷҳо, инчунин ҳангоми зарурат дар фурудгоҳи байналмилалии «Тошканд» ба номи И. Каримов таъмин намояд.

9. Ба Ширкати миллии телевизиону радиои Ӯзбекистон, Агентии миллии иттилооти Ӯзбекистон, агентии иттилоотии «Дунё», Иттифоқи журналистони Ӯзбекистон, Ассотсиатсияи медиавии Ӯзбекистон тавсия дода шавад, ки чорабиниҳоро дар воситаҳои ахбори омма ба таври васеъ инъикос намоянд.

10. Муайян карда шавад, ки маблағгузории тадбирҳои дар ин қарор пешбинишуда аз ҳисоби маблағҳои буҷавӣ, ки ба вазоратҳо, идораҳо ва ташкилотҳои дахлдор ҷудо карда мешаванд, инчунин маблағҳои ғайрибуҷавӣ ва дигар манбаъҳои дар қонунгузорӣ манънашуда амалӣ гардонда мешавад.

11. Назорати иҷрои қарори мазкур ба зиммаи Сарвазири Ҷумҳурии Ӯзбекистон А. Н. Арипов гузошта шавад.

 

Президенти Ҷумҳурии Ӯзбекистон   

 Ш. Мирзиёев

 

Шаҳри Тошканд,

5 феврали соли 2026.