Дар натиҷаи таваҷҷуҳ ба иқтисоди минтақаҳо имкониятҳои нав дар Фарғона низ кушода мешаванд. Дар ҳафт соли охир шумораи корхонаҳои саноатӣ тақрибан се маротиба зиёд шуда, ба 13 ҳазор расид. Дар доираи лоиҳаҳои сармоягузорӣ 116 ҳазор ҷойҳои корӣ ташкил гардиданд.

Сафари сарвари давлатамон дар моҳи июли соли ҷорӣ ба рушди иқтисодиёт такони нав бахшид. Дар тӯли даҳ моҳи соли равон ҳаҷми сармоягузориҳои хориҷӣ 1,5 миллиард долларро ташкил дода, содироти минтақавӣ ба 910 миллион доллар расид.

Зарур аст, ки дар соли оянда низ ин суръат коҳиш наёбад ва шумораи сармоягузориҳо, ҷойҳои корӣ ва ҳаҷми содирот афзоиш дода шаванд. Дар ҷамъомад Президенти кишвар ба имкониятҳои мушаххас дар ин самт ишора кард.

Ба наздикӣ минтақаи озоди иқтисодии "Қӯқанд" аз ҳисоби шаҳри Қувасой ба 210 гектар васеъ карда шуд. Дар ин қаламрав 185 лоиҳа бо арзиши умумии 1 миллиард доллар ҷойгир карда, тақрибан 12 ҳазор ҷойҳои корӣ ташкил карда шаванд. Ҳамчунин, ташкили технопарк дар масоҳати 71 гектар дар Қӯқанд дар марҳилаи аввал имкон медиҳад, ки корхонаҳо ба маблағи 900 миллион доллар ташкил шуда, 5 ҳазор ҷойҳои корӣ фароҳам оварда шаванд.

Бо соҳибкорони чинӣ созишномаҳои сармоягузорӣ ба маблағи 1 миллиард доллар ва бо Кореяи Ҷанубӣ ба маблағи 240 миллион доллар ба имзо расонида шуданд. Барои татбиқи онҳо зарур аст, ки дар ноҳияҳо ва шаҳрҳои вилоят минтақаҳои саноатӣ бо масоҳати 1 210 гектар ташкил карда шаванд. Дар корхонаҳои оянда 30 ҳазор нафар, аз ҷумла намояндагони оилаҳои камбизоат, ба кор таъмин мешаванд.

Дар ноҳияи Бешарик сохтмони маркази савдо-логистикӣ оғоз ёфт. Ин марказ ба минтақаи савдои озоди ба минтақаи дар Тирмиз мавҷуд монанд табдил дода мешавад ва мағозаҳо ба соҳибкорон ба иҷора дода мешаванд. Дар натиҷа, содироти вилоят 50 миллион доллар афзоиш ёфта, шумораи ҷойҳои корӣ ба 2 ҳазор мерасад. Чунин маҷмааро метавон дар шаҳри Қувасой низ сохт.

Имкониятҳои калон инчунин дар соҳаи кишоварзӣ мавҷуданд. Дар Фарғона дар ихтиёри аҳолӣ, дар канори роҳҳо, заминҳои кишт ва захираҳои обиву ҷангалӣ 91 ҳазор гектар замин вуҷуд дорад. Бояд онҳо самаранок истифода бурда, истеҳсолу коркарди маҳсулот зиёд карда шавад.

Масалан, дар 15 маҳаллаи ноҳияи Фарғона ҳамасола 6 ҳазор тонна малина парвариш карда мешавад. Соҳибкоре пешниҳод намуд, ки нигоҳдорӣ, коркард ва бастабандии малинаро ба роҳ монда, арзиши иловашударо 2,5 маротиба зиёд мекунад, агар дар наздикии минтақа замин ҷудо намоянд, ин натиҷа беҳтар хоҳад шуд. Соҳибкори дигари ташаббускор мехоҳад заминҳои ҷангалро дар ноҳияи Сӯх ба иҷора гирифта, дар 800 гектар ферула ва дар 50 гектар заъфарон парвариш кунад.

Бо кашидани 9 километр қубур ба ду истгоҳи насосӣ дар ноҳияи Олтиариқ ва афзоиши иқтидори онҳо боғи интенсивии масоҳаташ 1 400 гектараро таъсис додан мумкин аст. Дар ин замин 55 ҳазор тонна меваҳои ба содирот нигарондашуда парвариш карда мешаванд.

Дар ҷамъомад ҳокими вилояти Фарғона оид ба истифодаи чунин имкониятҳо нақшаҳои худро пешниҳод кард. Аз ҷумла, соли оянда ҷалби 3,7 миллиард доллар сармоя ва расонидани содирот ба 1,5 миллиард доллар дар назар аст. Ҳадафи таъмини шуғли 500 ҳазор шаҳрванд ва берун овардани 22 ҳазор оила аз камбизоатӣ гузошта шудааст.

Сарвари давлат дастур дод, ки ин пешниҳодҳо такмил дода шуда, қароре барои рушди иқтисодиёт таҳия карда шавад. Зарурати фароҳам овардани тамоми шароитҳо барои содиркунандагон, мусоидат ба шуғли аҳолӣ ва коҳиши бекорӣ таъкид гардид. Ҳамчунин аҳамияти баланд бардоштани масъулияти ҳокимон ва дигар шахсони мансабдор дар ин самт қайд гардид.