Ин дафъа сафари корӣ ноҳияҳои Шайхонтоҳур ва Чилонзорро, ки бо кӯчаи Бунёдкор пайваст мешаванд, дар бар гирифт. Дар яке аз кӯчаҳои асосии пойтахт – кӯчаи Бунёдкор – муассисаҳои бузурги фарҳангӣ ва ҳунарӣ, биноҳои маъмурӣ, хонаҳои истиқоматӣ, супермаркетҳо ва тарабхонаҳо ҷойгир шудаанд. Ба наздикӣ як қисми 1,5-километраи ин кӯча ба минтақаи хидматрасонӣ ва туризми гастрономӣ табдил дода шуд.

Сарвари давлат бо намояндагони ҷомеа аз шароитҳои дар ин қитъа муҳайёшуда дидан намуд. Дар шафати роҳ корҳои ободонӣ гузаронда, элементҳои ороишии ландшафтӣ, фаввораҳо насб карда, кӯча чароғон карда шудааст. Ба таври умум, шароит барои сайругашт, хӯрокхӯрӣ ва истироҳати мазмуннок фароҳам оварда шудааст.

Бо ин мақсад 90 субъекти соҳибкорӣ ба режими кори шабонарӯзӣ гузаштанд, ки 45-тои онҳо муассисаҳои нав мебошанд. Дар натиҷа, 500 ҷои кори нав таъсис ёфт.

Дар маҳаллаҳои ба кӯча наздик — Камолон, Янги Камолон ва Камолон Дарвоза — тақрибан 18 ҳазор нафар зиндагӣ мекунанд. Тағйирот пеш аз ҳама ба беҳтар шудани шароити зиндагии ҳамин сокинон таъсир мерасонад. Ғайр аз ин, ҳар сол ин маконро 255 ҳазор сайёҳ дидан мекунад. Ҳоло барои афзоиши ин нишондод то ба 1 миллион сайёҳ дар як сол шароити мусоид муҳайё шудааст.

Солҳои охир дар соҳаи сайёҳӣ зиёда аз 2 ҳазор соҳибкори нав ба фаъолият оғоз намудаанд. Соли гузашта шумораи сайёҳони хориҷӣ бори аввал аз 10 миллион нафар гузашт. Инфрасохтори сайёҳӣ ва хидматрасонӣ дар вилоятҳо босуръат рушд меёбад, деҳаҳои сайёҳӣ, хонаҳои меҳмонӣ ва кӯчаҳои гастрономӣ фаъолона дастгирӣ меёбанд.

Кӯчаҳои серодами ба ин монанд аллакай дар ноҳияҳои Мирабод, Олмазор, Чилонзор, Яккасарой ва Янгиҳаёт ташкил карда шудаанд. Кӯчаи Бунёдкор низ ба шабакаи мазкури сайёҳӣ ҳамроҳ мегардад. Ба таври умум, дар шаҳри Тошканд ба нақша гирифта шудааст, ки 26 кӯча ба минтақаҳои шабонарӯзии фаъол табдил дода шаванд ва шумораи муассисаҳое, ки дар чунин режим фаъолият мекунанд, ба 1000 адад расонида шавад.

Дар ҳамин ҷо ҳамчунин тақдимоти истгоҳҳои замонавии автобус ва ҷойҳои таваққуфи автомобилӣ баргузор гардид.