Дар ҷамъомад масъалаҳои боз ҳам таҳким бахшидани иқтидори мудофиавии кишвар, таъмини амнияти ҳарбӣ, инчунин рафти иҷрои вазифаҳои афзалиятноке, ки 13 январи соли ҷорӣ дар ҷамъомади васеи Шӯрои амният муайян гардида буданд, баррасӣ шуданд.
Таъкид гардид, ки дар ҷаҳон манбаъҳои ташаннуҷ ва низоъҳо боқӣ монда, рақобати геосиёсӣ шиддат мегирад ва хавфи хатару таҳдидҳои нав меафзояд. Дар шароити вазъи мураккаби байналмилалӣ, ки амалиёти ҳарбӣ дар баъзе минтақаҳо боиси паёмадҳои ҷиддии гуманитарӣ ва иқтисодӣ мегардад, таҳкими иқтидори мудофиавии кишвар ва таъмини амният аҳамияти махсус касб мекунад.
Вазири мудофиа дар бораи корҳое, ки ҷиҳати баланд бардоштани омодабошии ҷангии қӯшунҳо, тайёр намудани фаврии қисм ва воҳидҳо, таъмини онҳо бо силоҳу техникаи муосир, инчунин рушди инфрасохтори секторҳои ҳарбиву маъмурӣ амалӣ мегарданд, маълумот пешниҳод намуд.
Ба омӯхтани таҷрибаи пешқадами кишварҳои мутараққӣ ва таҷрибаи амалиёти ҷангӣ, инчунин ҷорӣ намудани равишҳои муосир дар низоми идоракунӣ ва омодасозии ҳарбӣ диққати махсус дода шуд. Бахусус, барои баланд бардоштани самаранокии қӯшунҳо зарурати истифодаи васеи технологияҳои нав, аз ҷумла низомҳои бесарнишин ва роҳҳалҳои идоракунии рақамӣ зикр гардид.
Ҳамчунин, оид ба навсозӣ ва рушди инфрасохтори секторҳои ҳарбӣ-маъмурӣ, полигонҳо, муассисаҳои таълимӣ ва иншооти таъминоти моддию техникӣ мутобиқ ба талаботи замон вазифаҳои мушаххас муайян гардиданд.
Бобати идомаи пайвастаи такмили низоми омодасозии кадрҳои ҳарбӣ, пурзӯр намудани корҳои илмиву тадқиқотӣ ва густариши барномаҳое, ки ба азхудкунии силоҳу технологияҳои муосир нигаронида шудаанд, супоришҳо дода шуд.
Дар анҷоми ҷамъомад Сарвари давлат оид ба рушди минбаъдаи Қувваҳои Мусаллаҳ ва таҳкими иқтидори мудофиавии мамлакат вазифаҳои дахлдорро муайян намуд.
