Дар чорабинӣ намояндагони баландпоя: намояндаи махсуси Президенти ИМА оид ба Осиёи Ҷанубӣ ва Марказӣ Сержио Гор, намояндаи махсус оид ба шарикиҳои глобалӣ Паоло Замполли, муовини вазири савдо Уильям Киммитт, раиси Палатаи савдои Амрико – Ӯзбекистон Кэролин Лэмм, инчунин топ-менеҷерони ширкатҳои Franklin Templeton, Citigroup, BNY Mellon, NASDAQ, Boeing, Mastercard, Visa, General Motors, Nvidia, Oppenheimer, Jefferies, Air Products, Traxys, FLSmidth, GoGreen Partners, Cleveland Clinic, Cargill, ҳамчунин роҳбарони ширкатҳои бузурги Ӯзбекистон иштирок карданд.
Сарвари давлат дар оғози сухан таъкид намуд, ки дар мулоқоти ахир бо Президенти ИМА Доналд Трамп оид ба тавсеаи ҳамкории иқтисодӣ ва ташаккули маҷмӯи бузурги лоиҳаҳои дарозмуддат созиш ҳосил гардид. Дар робита ба ин, қайд карда шуд, ки ин вохӯрӣ барои пешбурди вазифаҳои мазкур аҳамияти махсус дорад.
Дар солҳои охир ҳамкории гуногунҷанбаи Ӯзбекистон ва ИМА ба сатҳи баланд бардошта шуд. Ҳаҷми савдои мутақобила дар тӯли 8 сол 4 баробар афзуд. Зиёда аз 300 ширкати амрикоӣ ба Ӯзбекистон сармоягузорӣ намудааст.
Бо ширкати Franklin Templeton якҷоя Фонди миллии сармоягузорӣ таъсис дода шуд.
Ҳамкориҳои афзалиятнок дар самтҳои зерин: коркарди маъданҳои муҳим ва ташаккули занҷирҳои устувори таъминот, технологияҳои иттилоотӣ, зеҳни сунъӣ, рақамигардонӣ, нақлиёт, энергетика ва инфрасохтори иҷтимоӣ, кишоварзии «ақлманд», ҷорӣ намудани технологияҳои пешрафта ва соҳаҳои дигар муайян гардиданд.
Дар навбати худ, роҳбарони ширкатҳо ва бонкҳои пешбари ИМА аз шароити мусоид барои фаъолияти самараноки худ изҳори сипос карда, нақшаҳои ширкат дар татбиқи лоиҳаҳо ва барномаҳои муҳимро дар ин соҳаҳо баён доштанд.
