Масоили рушди минбаъдаи муколамаи сиёсӣ ва мубодилаҳои фарҳангиву гуманитарӣ, инчунин густариши ҳамкориҳои савдою иқтисодӣ ва сармоягузорӣ баррасӣ шуданд.
Дар оғози мулоқот Подшоҳи Урдун ба роҳбари кишвари мо барои даъват, инчунин барои қабули гарму самимӣ ба ҳайати урдунӣ миннатдории самимӣ баён кард.
Таъкид гардид, ки нахустин сафари сатҳи олӣ дар таърихи муносибатҳои дипломатӣ марҳалаи наверо дар ҳамкории дуҷониба боз намуда, онро ба сатҳи шарикии ҳамаҷониба мебарорад.
Таҳким ёфтани муносибатҳои дӯстии анъанавӣ ва ҳамкориҳои бисёрҷонибаи амалии байни Ӯзбекистон ва Урдун, инчунин ба ҳам монанд будани стратегияҳои ислоҳоти дар ду кишвар амалӣ мегардида зикр шуданд.
Сарони ду кишвар бо қаноатмандӣ ҳамкориҳои самарабахшро қайд намуда, зарурати идомаи фаъолонаи пуштибонии мутақобилаи ташаббусҳоро дар доираи Созмони Милали Муттаҳид, Созмони ҳамкории исломӣ ва дигар сохторҳои байналмилалӣ таъкид карданд.
Зарурати идомаи муколамаи созанда байни вазоратҳои корҳои хориҷии ду кишвар ва алоқаҳои зичи байниидоравӣ зикр гардид.
Омодагӣ ба чанд маротиба афзун намудани нишондодҳои савдои дуҷониба, татбиқи амалии лоиҳаҳои муштараки сармоягузорӣ ва шартномаҳои тиҷоратӣ тасдиқ гардид.
Созиш ба даст омад, ки ҳамкорӣ дар чунин соҳаҳо, мисли саноати кимиё ва нассоҷӣ, кишоварзии «ақлнок», геология, тандурустӣ ва фармасевтика, туризм ва дигар бахшҳо тақвият дода шавад.
Пешниҳод шуд, ки Комиссияи байниҳукуматӣ ва Шӯрои соҳибкорон таъсис дода шуда, то охири соли ҷорӣ ҷаласаҳои аввалини онҳо баргузор гарданд. Барои барқарор намудани робитаҳои дарозмуддати шарикӣ байни доираҳои тиҷоратӣ баргузории форуми соҳибкорони Ӯзбекистону Урдун бо иштироки ширкатҳо ва истеҳсолкунандагони пешсафи ду кишвар хизмат хоҳад кард.
Изҳор гардид, ки омодагӣ ба фаъолтар кардани мубодилаҳои фарҳангӣ, таълимӣ ва сайёҳӣ, аз ҷумла бо роҳи баргузории ҳафтаҳои муштараки фарҳанг, консертҳо, экспозитсияҳо ва намоишгоҳҳо вуҷуд дорад.
Робитаҳои дӯстонаи байни мардумони Ӯзбекистону Урдун таърихи тӯлонӣ доранд ва имрӯз такони нав ба рушд пайдо мекунанд. Дар ин замина, масъалаҳои ҳамкории муштарак дар самти омӯзиши мероси маънавии умумӣ, таҳкими ҳамкориҳо байни марказҳои таҳқиқотӣ ва институтҳои исломшиносии ду кишвар баррасӣ гардиданд.
Тарафҳо ба ақидаи ягона омаданд, ки пешбурди муштараки ғояҳои исломи таҳаммулпазир ва маърифатнок зарур аст. Сарвари кишвари мо ташаббуси Подшоҳ Абдулло II «Раванди Акаба»-ро, ки 10 сол пеш оғоз гардидааст, баланд арзёбӣ намуда, пешниҳод кард, ки яке аз ҷаласаҳои минбаъдаи ин иқдоми муҳим дар шаҳри Самарқанд баргузор гардад.
Қайд гардид, ки ба роҳ мондани парвозҳои мунтазам байни пойтахтҳои ду кишвар ва ҷорӣ намудани низоми бидуни раводид ба афзоиши тамосҳои тиҷоратӣ ва зиёд шудани ҷараёни сайёҳии мутақобил мусоидат хоҳад кард.
Ҳамчунин оид ба масъалаҳои мубрами рӯзномаи ҷаҳонӣ ва минтақавӣ мубодилаи афкор сурат гирифт.
Дар анҷоми музокирот Подшоҳ Абдулло II ибн ал-Ҳусейн сарвари кишвари моро даъват намуд, ки ба Урдун сафари расмӣ анҷом диҳад.
Музокирот дар фазои созанда, ошкоро ва боэътимод баргузор гардид.
