Дар оғози мулоқот роҳбари давлати мо Сарвазирро ба муносибати фаро расидани моҳи мубораки Рамазон ва Рӯзи Покистон табрик гуфт.
Масъалаҳои амалии густариш ва таҳкими минбаъдаи муносибатҳои ӯзбекистониву покистонӣ дар доираи шарикии стратегӣ ва ҳамкории бисёрҷанба бо назардошти татбиқи тавофуқоти дар сатҳи олӣ ҳосилшуда ба таври мушаххас баррасӣ гардиданд.
Бо қаноатмандӣ сатҳи баланди ҳамкорӣ, ки дар солҳои охир ба даст омадааст, қайд карда шуд. Муколамаи сиёсӣ фаъолона таҳким меёбад, мубодилаҳои байнипарлумонӣ ва байниидоравӣ босуръат рушд мекунанд.
Тибқи натиҷаҳои соли гузашта ҳаҷми гардиши молии дуҷониба қариб ба 500 миллион доллар расид. Дар Ӯзбекистон тақрибан 230 корхона бо иштироки сармояи покистонӣ фаъолият доранд. Шумораи парвозҳои ҳавоӣ байни ду кишвар афзуда, муносибатҳои мукотибавии байнибонкӣ тақвият меёбанд.
Лоиҳаҳои кооператсия дар соҳаҳои нассоҷӣ, дорусозӣ, саноати кимиё, кишоварзӣ ва дигар бахшҳо бомуваффақият татбиқ мегарданд.
Ҷонибҳо натиҷаҳои самараноки машваратҳои сиёсӣ ва ҷаласаи Комиссияи байниҳукуматиро, ки пеш аз ин сафар баргузор шуда буданд, истиқбол намуданд.
Дар доираи сафар намоишгоҳи маҳсулоти саноатии Ӯзбекистон баргузор мегардад.
Зарурати баргузории ҷаласаи нахустини Кумитаи ҳамоҳангсозии ниҳодҳои сиёсати хориҷии ду кишвар дар ояндаи наздик дар шаҳри Тошканд таъкид шуд.
Бо мақсади барқарор намудани робитаҳои дарозмуддати шарикӣ миёни доираҳои соҳибкорӣ, дар бораи таъсиси Шӯрои кории ӯзбекистониву покистонӣ ба мувофиқа расиданд.
Вазифа гузошта шуд, ки дар ояндаи наздик ҳаҷми гардиши молии мутақобил ба 2 миллиард доллар расонида шавад. Оид ба васеъ намудани номенклатураи молҳо дар доираи Созишномаи амалкунандаи савдои имтиёзнок, инчунин рӯйхати иҷозатномаҳои фитосанитарӣ барои маҳсулоти кишоварзии Ӯзбекистон ва истифодаи фаъолонаи хонаҳои савдои Ӯзбекистон дар шаҳрҳои Лоҳур ва Қарочӣ қарорҳо қабул гардиданд.
Дар доираи омодагӣ ба ин сафар бастаи лоиҳаҳо ба маблағи қариб 3,5 миллиард доллар дар соҳаҳои кишоварзӣ, электротехника, геология, дорусозӣ, саноати сабук ва хӯрокворӣ ва дигар бахшҳо ташаккул дода шуд.
Ба масъалаҳои рушди ҳамбастагии нақлиётӣ-логистикӣ таваҷҷуҳи хос зоҳир гардид. Аҳамияти суръат бахшидан ба татбиқи лоиҳаи сохтмони роҳи оҳани Трансафғонистон, инчунин пешбурди долони нақлиётии «Покистон – Чин – Қирғизистон – Ӯзбекистон» таъкид гардид.
Яке аз омилҳои асосии пешбарандаи рушди ҳамкории иқтисодӣ ҳамкории байниминтақавӣ муайян гардид.
Ташкили Форуми минтақаҳои ӯзбекистониву покистонӣ мувофиқа карда шуд ва пешниҳод гардид, ки ҷаласаи нахустини он дар соли ҷорӣ дар вилояти Хоразм баргузор гардад.
Ҳамчунин масъалаҳои роҳандозии ҳамкории системавӣ дар соҳаи сайёҳии зиёратӣ баррасӣ шуданд. Барои боз ҳам наздиктар кардани мардуми ду кишвар мувофиқа шуд, ки дар соли ҷорӣ дар Покистон Ҳафтаҳои фарҳанги Ӯзбекистон ва Рӯзҳои кинои ӯзбекӣ баргузор карда шаванд.
Роҳбари давлати мо инчунин пешниҳод намуд, ки дар шаҳри Лоҳур Маркази муштараки фарҳангӣ ҷиҳати тарғиби мероси Бобуриён таъсис дода шавад.
Дар ҷараёни музокирот оид ба масъалаҳои муҳими рӯзномаи байналмилалӣ ва минтақавӣ табодули назар сурат гирифт ва пайравӣ ба идомаи ҳамкории зич дар доираи сохторҳои бисёрҷониба тасдиқ гардид.
Дар анҷом Шавкат Мирзиёев Шаҳбоз Шарифро даъват намуд, ки ба Ӯзбекистон сафари ҷавобӣ анҷом диҳад.
