Дар ҷаласа инчунин Президенти Бонки аврупоии таҷдид ва рушд Одил-Рено Бассо, Президенти Бонки осиёии рушд Масатсугу Асакава, вазири сармоягузории Шоҳигарии Арабистони Саудӣ Холид ал-Фолиҳ, ноиби президенти Созмони ҷаҳонии тиҷорат Сянчен Чжан, ноиби президенти Бонки сармоягузории инфрасохтории Осиё Константин Лимитовский, ноиби президенти Корпоратсияи байналмилалии молиявӣ Стефани фон Фридербург иштирок доштанд. Директори оид ба коммуникатсияҳои Бонки аврупоии таҷдид ва рушд Ҷонатан Чарлз, ки  ба ҳайси хабарнигори шабакаи байналмилалии телевизионии BBC World News шӯҳрат пайдо кардааст, ба кори ҷамъомад роҳбарӣ кард.

Сарвари давлат иштирокдорони анҷуманро хайрамақдам гуфта, сухани ифтитоҳӣ намуда, дар бораи ислоҳоту дигаргуниҳои тайи чанд соли охири кишвар сухан ронда, самтҳои афзалиятноки рушди минбаъдаи онро муайян намуд.

Президент қайд кард, ки Ӯзбекистон дар тӯли асрҳо дар қаламрави Мовароуннаҳри бостонӣ дар маркази Роҳи бузурги абрешим ҷойгир буда, таваҷҷуҳи аҳли савдо, тоҷирон ва соҳибкорони манотиқи мухталифи ҷаҳонро ба худ ҷалб намуда, аз қадимулайём чун территорияе, ки дар он роҳҳои корвонӣ аз китъаҳои Осиё, Аврупо ва Африқоа мегузаранд, машҳур буд.

Сарзамини Ӯзбекистон, ки таърихи 3000-солаи давлатдории худро дорад, аз қадим марказе буд, ки дар он савдо, иқтисодиёт, илм, маданият ва санъат фаъолона инкишоф меёбанд.

Дар давом ин анъанаҳо дар асоси тамоюли «Аз гузаштаи бузург ба ояндаи бузург» дар мамлакати мо барои давом додани тараққиёти иқтисодию иҷтимоӣ кори пурҷӯшу хуруш бурда мешавад. Ба ин муносибат сарвари давлат самтҳои асосии ислоҳот дар Ӯзбекистонро номбар кард.

Аз ҷумла, дар соли 2017 қадами бузург гузошта шуд – маҳдудиятҳо барои табодули асъори хориҷӣ ва баргардонидани фоида аз ҷониби сармоягузорони хориҷӣ бекор карда шуданд. Бори аввал бонкҳо ва корхонаҳои бузурги Ӯзбекистон рейтингҳои байналмилалӣ гирифта, ба бозорҳои молиявии ҷаҳонӣ баромаданд.

Бо мақсади таъмини ошкорбаёнӣ барои ҷомеаи ҷаҳонӣ  Ӯзбекистон барои шаҳрвандони 90 кишвари хориҷӣ дастрасии бидуни раводид ҷорӣ намуда, ба шаҳрвандони 60 кишвари дигар имкони дарёфти раводид бо тартиби соддакардашуда дода шуд. Аз рӯи ин нишондодҳо мо ба мақоми давлати кушодтарин дар минтақа ноил гардидем.

Дар соҳаи мубориза бо коррупсия  ва таъмини ҳифзи ҳуқуқ ва озодии шаҳрвандон пайваста корҳо амалӣ карда мешаванд. Дар соли 2020 дар Ӯзбекистон Стратегияи миллӣ дар соҳаи ҳифзи ҳуқуқи инсон қабул карда шуда, бори аввал дар таърих мамлакатамон узви Шӯрои СММ оид ба ҳуқуқи инсон интихоб гардид. 

Пешравиҳо дар бунёди ҷомеаи шаҳрвандӣ, таъмини озодии баён, дастгирии фаъолияти ВАО, таъмини ҳифзи ҳуқуқи меҳнат ва рушди сармояи инсонӣ қайд карда шуданд. Аз ҷумла, эълом шуд, ки тайи 5 соли ахир дар кишвар беш аз 21 ҳазор муассисаи нави таълимӣ барои мактаббачагон бунёд шуда, ҳудуди 200 мактаби нав бунёд гардида, ҳудуди 3 ҳазор мактаб аз нав сохта ва муҷаҳҳаз гардонида шуданд. Дар муддати кӯтоҳ 82 донишгоҳу донишкадаи нав, аз ҷумла 23 донишгоҳи хориҷӣ таъсис ёфта, шумораи умумии муассисаҳои таҳсилоти олӣ ба 159 нафар расид. Дар натиҷа сатҳи фарогирии хатмкунандагони мактабҳо ба мактабҳои олӣ аз 9 то ба 28 фоиз расид.

Ҳамчунин дастовардҳо дар ислоҳоти соҳаи иқтисод: сабук кардани сарбории андоз, кам кардани боҷҳои гумрукӣ, такмили маъмурияти андоз, тадбирҳои системавӣ оид ба рушди соҳибкорӣ ва беҳтар намудани фазои сармоягузорӣ номбар шуданд.

Дар натиҷаи тадбирҳои андешидашуда ҳаҷми сармоягузории солонаи хориҷӣ, ки ба иқтисодиёти кишвар ҷалб карда мешаванд, се баробар афзуд. Ҳаҷми умумии онҳо дар 5 соли охир 25 миллиард долларро ташкил дод. Ҳамзамон, ҳудуди 59 ҳазор лоиҳаи сармоягузорӣ амалӣ гардида, аз ҳисоби онҳо беш аз 2,5 миллион ҷойҳои нави корӣ таъсис дода шуданд.

Зимни суханронии худ Сарвари давлат ҳамчунин ба афзалиятҳои асосии “Стратегияи рушди Ӯзбекистони Нав” барои солҳои 2022-2026, аз ҷумла дар қатори онҳо пайваста идома додани тадбирҳо ҷиҳати таъмини суботи иқтисодӣ ва сиёсӣ, фароҳам овардани  низоми зич ва хеле самараноки идораи давлатӣ, ки  ба дастгирии соҳибкорӣ, кам кардани ҳиссаи давлат дар иқтисодиёт, ҳавасмандгардонии минбаъдаи фаъолияти соҳибкорӣ, ҳифзи ҳуқуқи сармоягузорон, рушди босуръат ва модернизатсияи инфрасохтор, ҳавасмандгардонии истеҳсоли маҳсулоти дорои арзиши иловашуда дар асоси ашёи хоми маҳаллӣ, сармоягузорӣ ба сармояи инсонӣ, либерализатсияи савдои хориҷӣ ва таъмини баробарии гендерӣ таваҷҷуҳ зоҳир намуд.

Эълон шуд, ки дар натиҷаи ислоҳот дар 5 соли оянда маҷмӯи маҳсулоти дохилӣ ба 100 миллиард доллар расида, содироти солона ду баробар ва аз 30 миллиард доллар зиёд мешавад. Дар баробари ин ҳиссаи сектори хусусӣ дар ММД ба 80 фоиз расонда мешавад. То соли 2030 Ӯзбекистон ваъда медиҳад, ба кишваре табдил ёбад, ки даромади шаҳрвандонаш аз ҳисоби миёна боло бошад.

Сарвари давлат пайравиро ба корҳои пайвастаи минбаъд низ ҷиҳати фароҳам овардани шароити мусоид ва ҷолиб барои сармоягузорон ва ҳамаҷониба амиқтар намудани шарикии мутақобилан судманд бо шарикони хориҷӣ ва созмонҳои байналмилалӣ қайд намуд.

Дар охир Президент ба иштирокчиён кори пурсамар дар Форум, ҳамкории фаъол ва ноил шудан ба созишномаҳои нави мутақобилан судманд оид ба татбиқи лоиҳаҳои муштаракро таманно намуд.

Зимни мулоқот роҳбарони ниҳодҳои молиявии байналмилалӣ ва созмонҳои молиявӣ низ суханронӣ намуда, доир ба дурнамои рушди Ӯзбекистон назари худро баён намуданд.

Дар ҳошияи ҷаласаҳои панелӣ ва муҳокимаҳои Форум иқтидори сармоягузорӣ, тиҷоратию иқтисодӣ ва саноатии Ӯзбекистон, дурнамои рушди муносибатҳои тиҷоратии минтақавӣ ва ҷаҳонӣ, механизмҳои ҷалби сармоягузорӣ, либерализатсияи савдо ва баланд бардоштани рақобатпазирии иқтисодиёти миллӣ, қадамҳои минбаъдаи индустрикунонии кишвар ва тамоюли саноат ба истеҳсоли маҳсулот бо арзиши баланди иловашуда, тадбирҳои табдил додани соҳаи энергетикаи ватанӣ ва гузаштан ба манбаъҳои алтернативии энергия, масъалаҳои таҳкими робитаи нақлиётии кишварҳои минтақа ва баланд бардоштани иқтидори транзитии онҳо баррасӣ мешаванд.

Ба барқарорсозӣ ва ҳавасмандгардонии рушди босуръати фаъолияти иқтисодӣ дар давраи пас аз COVID-19, паст кардани сатҳи камбизоатӣ, танзими сиёсати пулию қарзӣ, дастгирии соҳибкорӣ, рушди бахши бонкӣ ва бозори молиявӣ таваҷҷуҳи махсус зоҳир карда мешавад.

Дар доираи барномаи Форум  инчунин ҷамъомади 5-уми Комиссияи байниҳукуматӣ дар соҳаҳои савдо, иқтисод, илму техника, фарҳанг, варзиш ва ҷавонон байни Ҷумҳурии Ӯзбекистон ва Шоҳигарии Арабистони Саудӣ, форуми сармоягузории Ӯзбекистону Чин «Ҳамкории саноатӣ. Имкониятҳои нав», инчунин Платформаи кишвар барои Ӯзбекистон, ки роҳбарони институтҳои молиявии байналмилалӣ, ниҳодҳои молиявии хориҷӣ ва шарикони рушд иштирок мекунанд, баргузор мегарданд.

Анҷумани байналмилалии сармоягузории Тошканд 26 март ба кори худ хотима медиҳад.