Яке аз ҷанбаҳои муҳими ислоҳот дар кишвар – дастгирии ғояҳои пешқадами аҳолӣ, бахусус ҷавонон ва шаҳрвандони ташаббускор, инчунин фароҳам овардани механизмҳои бозу муассир барои табдил додани онҳо ба лоиҳаҳои амалӣ мебошад.

Бо ин мақсад, мутобиқи Фармони Президент аз 14 июли соли 2025 «Дар бораи чораҳои иловагӣ оид ба дастгирии минбаъдаи ташаббусҳои ояндадор дар татбиқи ислоҳот», таҷрибаи баргузории форуми ташаббусҳои ояндадори «Келажак учун» роҳандозӣ гардид. Ҳадафи асосии он интихоб, дастгирӣ ва татбиқи пешниҳодҳои муҳимест, ки аз ҷониби ҷомеаи васеъ пешниҳод мешаванд.

Дар доираи форум крауд-платформаи kelajakuchun.gov.uz ба роҳ монда шуд. Дар он ба шаҳрвандон имконият дода шудааст, ки ташаббусҳои худро ошкоро ҷойгир намуда, барои баррасӣ ва арзёбии коршиносон пешниҳод намоянд.

Имсол кумитаи тадорукоти форум рушди соҳибкорӣ ва таъмини шуғл, экология, таъмини об ва густариши энергетикаи «сабз», ҷорӣ намудани технологияҳои рақамӣ ва зеҳни сунъӣ, баланд бардоштани сифати тандурустӣ ва маориф, инчунин рушди низоми суду ҳуқуқро дар асоси равишҳои муосир ба сифати самтҳои афзалиятнок муайян кардааст.

Пас аз эълони форум аз аҳолӣ зиёда аз 1300 пешниҳод ва ташаббус ворид гардид. Онҳо аз ҷониби Агентии рушди стратегӣ ва ислоҳот ва бонки «Бонки рушди тиҷорат» пешакӣ баррасӣ шуда, аз рӯи самтҳои афзалиятнок гурӯҳбандӣ шуданд.

Сипас ташаббусҳо бо иштироки аъзои Шӯрои менторон ва коршиносони соҳавӣ таҳлил гардида, аз нигоҳи аҳамияти амалӣ, имкони татбиқ, самараи иҷтимоию иқтисодӣ ва дурнамои густариш арзёбӣ шуданд. Дар натиҷа, рӯйхати беҳтарин-50 ва беҳтарин-10 лоиҳаи муҳимтарини рӯз ташаккул ёфт.

Дар рӯзи аввали форум маросими сарфарозгардонии муаллифони ташаббусҳое, ки ба даҳгонаи беҳтарин шомил шуданд, баргузор гардид. Ба ғолибон сертификат ва мукофотҳои пулӣ супурда шуданд.

Дар байни лоиҳаҳое, ки ба Президент муаррифӣ шуданд, ташаббусҳо оид ба истифодаи партовҳои пластикӣ дар сохтмони роҳ, таҳияи дастгоҳи инноватсионӣ барои тозакунии ҳаво, таъмини минтақаҳои дурдаст бо неру тавассути дастгоҳҳои мобилӣ, ҷорӣ намудани низоми автоматии огоҳсозӣ дар гузаргоҳҳои пиёдагард ва таъсиси платформаи миллии муҳандисӣ буданд.

Дар маросими тақдимот таъкид гардид, ки ҳар яке аз ин ғояҳо ба ҳалли мушкилоти мушаххаси иҷтимоӣ ё иқтисодӣ равона шудааст.

Лоиҳаҳо аз рӯи самтҳои дахлдор ба Кумитаи миллии экология ва тағйирёбии иқлим, Вазорати кишоварзӣ, Вазорати таҳсилоти олӣ, илм ва инноватсия, Вазорати технологияҳои рақамӣ, Вазорати адлия, Вазорати таҳсилоти томактабӣ ва мактабӣ, Вазорати корҳои дохилӣ, Вазорати нақлиёт, Кумитаи роҳҳои автомобилгард ва дигар ташкилотҳои масъул вобаста карда мешаванд.

Нақшаи чорабиниҳо оид ба татбиқи онҳо тасдиқ гардида, иҷрои ҳар як ташаббус ба таври мунтазам назорат хоҳад шуд. Бонки саҳомию тиҷоратии «Бонки рушди тиҷорат» дар маблағгузории лоиҳаҳои ояндадор ва мониторинги доимии иҷрои онҳо иштирок мекунад.

Сарвари давлати мо аҳамияти таваҷҷуҳи махсус ба натиҷаҳои амалии ташаббусҳо, ҳамкории муштарак бо муаллифони онҳо ва табдил додани ҳар як лоиҳа ба роҳи ҳалли қобили зиндагӣ, аз ҷиҳати иқтисодӣ самарабахш ва барои мардум манфиатоварро таъкид намуд.