Дар ин мулоқот дигаргуниҳое, ки дар шаҳру деҳот ба амал меоянд, шароити зиндагии аҳолӣ, арзиши сулҳу субот дар кишвар мавриди баррасӣ қарор гирифтанд.
Сарвари давлат таъкид кард, ки ғояи «Ба хотири шараф ва қадру қимати инсон» ба омили асосии сиёсати Ӯзбекистон табдил ёфтааст. Дар асоси ҳамин ғоя, масъалаҳои беҳбуд бахшидани шароити зиндагӣ, баланд бардоштани даромад ва сатҳи некӯаҳволии шаҳрвандон, ободонии маҳаллаҳо ба масъалаҳои аввалиндараҷаи рӯзномаи иҷтимоӣ табдил ёфтаанд.
Дар доираи барномаҳои мавҷуда, ки ҳадафи онҳо истифодаи пурраи захираҳои минтақаҳо ва коҳиши сатҳи камбизоатӣ мебошад, дар кишвар барои меҳнати шоиста дар Ватан шароити воқеӣ фароҳам оварда мешавад. Ҷавонон ва занон ба касбҳои муосир, серталаб ва даромаднок омӯзонида мешаванд.
Тағйироти сохторӣ дар иқтисодиёт натиҷаҳои намоён медиҳанд: саноат босуръат рушд мекунад, корхонаҳое, ки ба технологияи пешрафта асос ёфтаанд, маҳсулоти дорои арзиши баланди иловашударо истеҳсол мекунанд. Ҳамзамон, дар бахшҳои кишоварзӣ, сайёҳӣ, нақлиёт ва энергетика лоиҳаҳои бузург амалӣ шуда истодаанд, ки ба рушди ҳаматарафаи кишвар мусоидат менамоянд.
Президенти мамлакат нақши муҳими инфрасохтори роҳҳоро дар рушди иқтисодиёт ва рӯҳияи ҷомеа қайд карда, зарурати муносибати низомманд ба ин соҳаро таъкид намуд. Дар ин замина, ба роҳбарони масъул супоришҳои мушаххас дода шуданд. Дар ду соли охир дар саросари кишвар 40 ҳазор километр роҳ ва 540 пул таъмир карда шудааст. Дар соли ҷорӣ дар вилояти Қашқадарё навсозии умумии 100 километр роҳҳои магистралӣ ба нақша гирифта шудааст. Сарвари давлат дастур дод, ки амалисозии ин лоиҳаҳо суръат бахшида шавад ва ободонии минтақаҳои атрофи роҳҳо таъмин гардад.
Намояндагони насли калонсол зикр карданд, ки мардум воқеан дигаргуниҳоро дар зиндагии ҳаррӯзаи худ эҳсос мекунанд ва ба роҳи ислоҳот баҳои баланд медиҳанд. Яке аз иштирокчиёни вохӯрӣ гуфт, ки имрӯз занон барои худтатбиқкунӣ ва фаъолияти муфид дар соҳаҳои гуногун — ҳам дар ҷойи кор ва ҳам дар ҳаёти ҷамъиятӣ имкониятҳои воқеӣ доранд. Дар натиҷа, онҳо дастгириро эҳсос мекунанд, боэътимодтар мешаванд, дар доираи оила ва ҷамъият эҳтиром пайдо мекунанд ва умуман аз зиндагии худ бештар қаноатманд мебошанд.
