Мардуми мо дорои мероси ғании маънавӣ мебошад. Бо дарназардошти ниёзҳои рӯзафзуни зеҳнӣ, эстетикӣ ва фарҳангии аҳолӣ, такмили идоракунӣ ва маблағгузории соҳаи фарҳанг, ворид кардани таҷрибаи пешқадами хориҷӣ дар ин самт пешбинӣ шудааст.
Аз ҷумла, татбиқи механизмҳои шарикӣ давлатию хусусӣ дар фаъолияти марказҳои фарҳанг ва амалӣ намудани лоиҳаҳои стартап, ки ғояҳои эҷодиро дастгирӣ мекунанд, дар назар аст. Ҳамчунин, офаридани маҳсулоти ватании таърихӣ, илмӣ ва аниматсионӣ, ки бренди Ӯзбекистонро ташаккул медиҳанд ва ҳисси ватандӯстиро дар байни ҷавонон таҳким мебахшанд, дастгирӣ хоҳад ёфт.
Сарвари давлат супориш дод, ки таҷрибаи пешқадами хориҷӣ дар соҳаи фарҳанг марҳила ба марҳила ҷорӣ карда шавад.
Бо қарори Президенти Ӯзбекистон Институти миллии санъати эстрадӣ ба номи Ботир Закиров таъсис дода шудааст. Ҳоло таъсиси ёдгории ҳунарманд, ҷорӣ намудани стипендия ва баргузор кардани озмуни байналмилалии санъати эстрадӣ ба номи Батир Закиров дар назар аст. Беҳтарин хатмкунандагони зинаи бакалаврӣ ҳар сол барои таҳсил дар зинаи магистратура ба хориҷ фиристода мешаванд ва иштироки донишҷӯёни боистеъдод дар озмунҳои бонуфузи байналмилалӣ дастгирӣ хоҳад ёфт.
Дар ҷараёни сафари худ ба вилояти Андиҷон Президент бо ташаббуси ҷовидона нигоҳ доштани хотираи Ҳунарманди халқӣ Шералӣ Ҷӯраев баромад кард. Дар асоси мактаби махсуси санъат дар Андиҷон Мактаби олии мусиқӣ ва санъати ба номи Шералӣ Ҷӯраев таъсис дода мешавад. Ҳамасола ба номи ӯ озмуни телевизионии суруди миллӣ баргузор мегардад.
Дар мактаби олии мазкур озмоишгоҳи илмӣ-эҷодӣ таъсис дода шуда, фонди тиллоии сурудҳои Шералӣ Ҷӯраев шакл хоҳад гирифт. Ҳамчунин, боз кардани студияи муосири сабти овоз ва наворбардорӣ дар назар аст, ки иҷрокунандагони ҷавони боистеъдод метавонанд аз он бо имтиёз истифода баранд.
Айни ҳол дар мамлакат Оркестри симфонии давлатии Ӯзбекистон ва 8 оркестри касбӣ дар таркиби филармония фаъолият мекунанд. Аммо фаъолияти онҳо асосан бо шаҳри Тошканд ва чорабиниҳои ҷумҳуриявӣ маҳдуд аст.
Дар робита ба ин, қарор қабул шудааст, ки марҳила ба марҳила оркестрҳои мазкур дар минтақаҳо низ таъсис дода шаванд. Аз ҷумла, дар вилояти Фарғона оркестри асбобҳои халқӣ ва Оркестри симфонӣ ташкил карда мешавад. Онҳо пурра бо асбобҳои мусиқӣ, таҷҳизоти садо ва рӯшноӣ, либосҳои саҳнавӣ ва дигар ҷиҳозҳо таъмин мегарданд.
Сарвари давлат зарурати ба оммаи васеъ расонидани беҳтарин асарҳои санъати миллӣ ва ҷаҳонӣ ва ташкил кардани сафари ҳунарии оркестрҳоро дар ноҳияҳо ва шаҳрҳои мамлакат таъкид намуд.
Дар Ӯзбекистон, ки дорои мероси ғанӣ ва гуногуни фарҳангӣ мебошад, имкониятҳои фаровон барои рушди иқтисодиёти эҷодӣ мавҷуданд. Дар айни ҳол дар ин соҳа 14 ҳазор корхона фаъолият доранд ва қариб 100 ҳазор нафарро бо ҷойи кор таъмин мекунанд. Дар панҷ соли оянда ҳаҷми иқтисодиёти эҷодӣ ду баробар зиёд карда шуда, ҳиссаи он дар маҷмӯи маҳсулоти дохилӣ то ба 5 фоиз расонида мешавад.
Соли гузашта қонуне қабул шуд, ки ин соҳаи муҳимро танзим менамояд. Дар шаҳри Тошканд чаҳорумин Конфронси ҷаҳонӣ оид ба иқтисодиёти эҷодӣ баргузор гардид. Ҳамкорӣ бо созмонҳои бонуфузи байналмилалӣ, ба монанди ЮНЕСКО, ЮНКТАД, Созмони ҷаҳонии моликияти зеҳнӣ ва кишварҳое мисли Фаронса, Италия, Индонезия, Арабистони Саудӣ ва Қатар ба роҳ монда шудааст.
Яке аз самтҳои муҳимтарини саноати эҷодӣ — ҳунармандӣ мебошад. Дар раванди тақдимот пешниҳодҳо оид ба рушди минбаъдаи ин соҳа баррасӣ гардиданд.
Аз ҷумла, якҷо бо Бунёди шоҳигарии Британия дар шаҳри Тошканд таъсиси платформаи илмии академӣ пешбинӣ шудааст. Дар асоси он омода кардани мутахассисони зинаи магистратура, гузаронидани таҳқиқот ва таҳияи китобҳои дарсӣ ба роҳ монда мешавад. Дар марҳилаҳои минбаъда беш аз 3 ҳазор косиби боистеъдод ба ин платформа ҷалб карда мешаванд. Дар оянда, платформа ба мактаби пурраи ҳунарҳои амалӣ табдил дода хоҳад шуд.
Соли 2023 шаҳри Бухоро ба Шабакаи шаҳрҳои эҷодии ЮНЕСКО дар самти «Косибӣ ва ҳунарҳои халқӣ» шомил гардид. Дар ин шаҳри бостонӣ 2 ҳазор усто дар 36 самти ҳунармандӣ фаъолият мекунанд.
Дар давраи аз моҳи сентябр то ноябр дар Бухоро бори аввал биенналеи санъати муосир баргузор мешавад, ки дар он 70 рассоми маъруф аз 40 кишвари дунё иштирок хоҳанд кард.
Минтақаи дигари умедбахш дар соҳаи сайёҳӣ — Ҷумҳурии Қароқалпоқистон мебошад. Дар айни замон дар ин минтақа тақрибан 2 ҳазор ҷавон ба таври касбӣ ба ҳунарҳои халқӣ машғуланд ва бисёр дигарон хоҳиши омӯхтани косибиро доранд.
Дар робита ба ин, боғи «Истиқлол» дар шаҳри Нуқус ба кластери эҷодӣ табдил дода мешавад, ки дар доираи он мактаби Арал — фазои таълимӣ барои косибон ва тарроҳон, ки донишҳои суннатиро бо равишҳои инноватсионӣ муттаҳид мекунад, таъсис меёбад.
Ба шахсони масъул супориш дода шуд, ки пешниҳоди мазкурро бо сифати баланд амалӣ намуда, чорабиниҳои дарпешистодаро дар сатҳи баланди ташкилӣ баргузор намоянд.
