Имсол дар вилоят дар 75 ҳазор гектар пахта кишт карда шудааст. Дар ин рӯзҳо ба қариб 80 ҳазор гектар зироати ғалладона кошта мешавад.
Сарвари давлатамон киштзорҳои хоҷагиҳои фермерии «Арслон бобо» ва «Омонбой ӯғли Туғал»-и вилояти Сирдарёро аз назар гузаронд.
Хоҷагии ба номи "Арслон бобо" дар ихтиёри худ 90 гектар замин дорад, ки имсол аз ҳар гектар 80 сентнерӣ ғалла гирифта шуд. Ҷамъоварии пахта босуръат давом дорад. Ғайр аз ин, картошка, мош, сабзӣ, пиёз ва дигар зироатҳои дуюмдараҷа парвариш карда, ба бозор бароварда мешавад.
Хоҷагии ба номи «Омонбой ӯғли Туғал» 62 гектар заминро кишт мекунад. Дар ин ҷо ҳам аз ҳар гектар бештар аз 80 сентнерӣ ғалла гирифта шуд. Аз рӯи миқдори куракҳои бехи ниҳолҳо ва рафти ҷамъоварии ҳосил ҳосили пахта низ аъло буд.
Дар ин хоҷагиҳои ҳамсоя ба туфайли лазерӣ ҳамвор кардани замин 30-40 фоиз об сарфа шуда, вақти обёрӣ кам шуд. Насосҳо аз панелҳои офтобӣ неру мегиранд. Дар доираи лоиҳаи умумимиллии «Макони сабз» дар атрофи майдонҳо дарахтони тут, бед ва дигар дарахтҳо шинонда шуданд.
Президент дар ин ҷо бо фермерони сирдарёгӣ ва намояндагони калонсолон суҳбат орост.
— Ман ба ин ҷо омадам, ки то шуморо бинам, ба коратон барор орзу кунам, — гуфт Шавкат Мирзиёев. — Агар одилона баҳо диҳем, пас гуфтан мумкин аст, ки дар Сирдарё дигаргуниҳо ба амал меоянд. Аммо замон бо шиддат чунон тез мегузарад, ки дигаргунсозиҳо талаботи одамонро қафо мегузорад. Барои ба вуҷуд овардани шароити мувофиқ, қонеъ гардондани талаботи одамон нақшаҳои нав тартиб додан зарур аст. Имрӯз ман на танҳо барои изҳори миннатдорӣ ба сокинони азизи Сирдарё омадаам, балки барои рушди минбаъдаи ноҳияҳо, баланд бардоштани некуаҳволии мардум самтҳои зарурии корро муайян намоям.
Фермерон имкониятҳои васеъ дар соҳаи кишоварзиро, ки фоиданоктар шуданд, барҳам додани меҳнати маҷбуриро қайд намуда, дар бораи навъҳои иловагии маҳсулот сухан ронданд.
— Замин манбаи некуаҳволии халқи мост. Замоне ба ғайр аз пахта, ҳатто дар як гектар майдони пахта рӯёндани зироати дигар ҷиноят ҳисоб меёфт, ҳар касе, ки такроран зироат мекорад, зери таъқиб гирифта мешуд. Ва имрӯз ба аҳолӣ 80 ҳазор гектар пахтаю ғаллазор додем, аз ин ҳам зиёдтар ҷудо мекунем. Охир, маҳсулоти аз онҳо рӯёндашуда ба халқи мо низ хизмат мекунад: ба бозор мебароянд, ба оилаҳо даромад меоранд. Имрӯз роҳбарони сатҳи ҷумҳуриявӣ ва ҳокимон пешниҳод карданд: агар боз 7,5 ҳазор гектар ҷудо карда шавад, дар вилояти Сирдарё бекориро комилан барҳам додан мумкин аст. Ман онро комилан ҷонибдорӣ кардам, — гуфт Президент.
Сарвари давлат дар ин ҷо бо ҷавононе, ки бо кишоварзӣ машғуланд, суҳбат намуд. Онҳо аз ин хоҷагии фермерӣ 0,5 гектар замин гирифтанд, ки дар он мош, сабзӣ, пиёз, сир мекоранд. Онҳо дар бораи нақшаҳои дохил шудан ба донишкада, инчунин аз ҳисоби даромади гирифтаашон обод кардани манзили худ нақл карданд.
Президент инчунин аз киштзори хоҷагии фермерии «Шукроналик мӯжизалари»-и ноҳияи Сайхунобод дидан кард.
Майдони умумии хоҷагӣ 70 гектарро ташкил медиҳад. Имсол дар 25 гектар пахта ва дар 45 гектар ғалла кишт карда шудааст. Ҳосилнокӣ баланд аст.
Дар мамлакати мо ба он зироатҳое, ки даромади зиёд меоранд, афзалият дода мешавад. Ин усул дар хоҷагии қишлоқ самараи хуб медиҳад. Хоҷагӣ аз замини аз пахта холишуда низ нафъи калон дида истодааст. Аз ҷумла, имсол дар майдони 45 гектар ба сифати зироати дуюм мош кишт карда шуд. Дар рафти шиносоӣ бо фаъолияти хоҷагӣ зарурати васеъ омӯхтани таҷрибаи хориҷии парвариши ин зироат, истифодаи усулҳои илман асосноки баланд бардоштани ҳосилнокии меҳнат нишон дода шуд.
Инчунин бо намояндагон ва масъулини соҳаи кишоварзӣ суҳбат сурат гирифт. Сарвари давлат таъкид кард, ки маҳсулнокӣ тавассути истифодаи инноватсия ва навъҳои беҳтарин, истифодаи оқилона ва баҳисобгирии об баланд бардошта шавад. Супориш дода шуд, ки шароити зисту зиндагонии фермерону коргарон беҳтар гардонда, аз ҷумла, барои онҳо хонаҳои хурди арзон сохта шаванд.
