Профессори физика ва астрономияи University of Rochester Адам Франк изҳор доштааст, ки зеҳни сунъӣ ҳеҷ гоҳ наметавонад эҷодкории
инсонро пурра бозофарӣ кунад. Ба гуфтаи донишманд, ЗС танҳо як васила
дар дасти инсон боқӣ мемонад. Дар ин бора астрофизик дар мақолае барои Forbes
навиштааст, хабар медиҳад korrespondent.net.
Ба гуфтаи Франк, ӯ аз имкониятҳои зеҳни сунъии муосир ба ҳайрат
омадааст, аммо мутмаин аст, ки ҳеҷ як система наметавонад нодирии тафаккури
инсониро такрор намояд.
Ҳамчун намунаи эҷодкории инсонӣ астрофизик гурӯҳи мусиқии
ҷопонии Atarashii Gakko-ро мисол овард. Ин гурӯҳ дар эҷодиёти худ панк-рок,
хип-хоп, ҷаз ва хореографияи муосирро муттаҳид мекунад. Ба андешаи Франк, маҳз ғайриоддӣ
будани идеяҳо ва равиши эҷодӣ чунин лоиҳаҳоро нодир мегардонад.
Донишманд таъкид кард, ки зеҳни сунъӣ метавонад дархости
корбарро иҷро карда, муҳтавои монанд эҷод намояд, аммо худи идея ҳамоно дар
шуури инсон ба вуҷуд меояд.
Ҳамзамон Франк эътироф кард, ки зеҳни сунъӣ барои
инсоният имкониятҳои нав фароҳам меорад ва метавонад дар бисёр соҳаҳо ёвари
пуриқтидор бошад. Аммо ӯро он чиз нигарон мекунад, ки технологияҳо зери баҳонаи
баланд бардоштани самаранокӣ ҳарчи бештар ҷорӣ карда мешаванд.
