Ба гуфтаи Кумитаи давлатии амнияти миллии Тоҷикистон (КДАМ), шаби 24 декабр байни террористоне, ки аз қаламрави Афғонистон ба ҳудуди Тоҷикистон ворид шудаанд, ва сарҳадбонони тоҷик задухӯрди мусаллаҳона рух дода, дар натиҷа талафоти ҷонӣ ба қайд гирифта шудааст.
Дар ҷараёни амалиёт се узви созмони террористӣ, ки ғайриқонунӣ марзро дар ноҳияи Шамсиддин Шоҳини вилояти Хатлон, ҳаммарз бо Афғонистон, убур карда буданд, муқовимати мусаллаҳона нишон дода, безарар гардонда шуданд. Дар ин ҳодиса ду корманди Хадамоти сарҳадии Тоҷикистон ба ҳалокат расиданд.
Гуфта мешавад, ки аз маҳалли ҳодиса се автомати М16, як автомати Калашников, се таппончаи истеҳсоли хориҷӣ бо овозхомӯшкунанда, 10 гранатаи дастӣ, як дастгоҳи биниши шабона, маводи тарканда ва дигар лавозимоти ҷангӣ мусодира карда шудаанд, хабар медиҳад tass.ru.
Дар изҳорот таъкид мешавад: «Ин аллакай сеюмин ҳолат дар давоми як моҳи охир аст, ки ҳамлаи мусаллаҳона, амали террористӣ ва убури ғайриқонунии марзи давлатӣ аз Афғонистон ба қаламрави Тоҷикистон ба амал омада, боиси ҳалокати сокинони осоишта ва хизматчиёни ҳарбӣ гардид».
Тибқи иттилои маркази матбуотии неруҳои сарҳадии КДАМ Тоҷикистон, ки агентии «Ховар» онро нашр кардааст, вазъият дар марз пас аз ҳамлаи террористон ором боқӣ мемонад. «Дар айни замон вазъият дар марзи давлатӣ ором аст. Тафтишоти ин ҳодиса идома дорад», — гуфта мешавад дар изҳорот.
