Нақлиёти ҷамъиятии қулай атрибути зарурии шаҳри замонавӣ мебошад. Аммо дар Тошканд ин масъала ба як мушкили таъхирнопазир табдил ёфтааст. Фарсуда шудани парки автобусҳо, баста шудани автостансияҳои марказӣ, васли ғайрисамарабахши хатсайрҳо барои сокинон як қатор нороҳатиҳо ба вуҷуд овард.

Ғайр аз ин, дар давоми панҷ соли охир аҳолии пойтахт ба 300 ҳазор нафар афзуд, ҳудуди он васеъ гардид. Ҳар рӯз ба пойтахт бештар аз як миллион нафар одамон меоянду мераванд. Аммо низоми нақлиёти ҷамъиятӣ ба дигаргуниҳое, ки дар пойтахт ба амал меоянд, мувофиқат намекунад. Муҳлати хизмати 350 автобус аз 10 сол гузаштааст, 393 автобус намерасид. Аз сабаби тирбандиҳо дар кӯчаҳо фосилаи автобусҳо дар соатҳои авҷ то 30 дақиқа меафзояд.

Натиҷаи ҳамин аст, ки мусофирон аз хидматрасонӣ ба таври ҳаққонӣ норозӣ буда, нақлиёти шахсиро афзалтар медонанд. Дар шаҳри Тошканд мизони истифода аз мошини шахсӣ мутаносибан 79 дарсад, сатҳи истифода аз нақлиёти ҷамъиятӣ ҳамагӣ 21 дарсад аст.

Шавкат Мирзиёев 19 октябри соли гузашта дар мулоқот бо интихобкунандагон дар Тошканд ба ин масъала таваҷҷуҳи хосса дода, таъкид карда буд, ки чораҳои зарурӣ андешида мешаванд.

Дар муаррифии имрӯза вазифаҳо дар ин самт мавриди баррасӣ қарор гирифтанд.

Вазифаи асосии Вазорати нақлиёт ва ҳокимияти Тошканд аз он иборат аст, ки дараҷаи истифодаи нақлиёти ҷамъиятӣ 2 баробар зиёд карда шавад. Таъкид шуд, ки дар баробари ин ба равиши муназзам ва осон кардани ҳаракати одамон, таъмини пайвастагӣ ва рушди ҳамаҷонибаи тамоми намудҳои нақлиёт, аз ҷумла хатҳои хатсайр, роҳи оҳан ва метро, ​​инчунин инфрасохтор барои велосипедронӣ ва сайру гашт бояд эътибори аввалиндараҷа дода шавад.

Супориш дода шуд, ки дар шоҳроҳҳои асосии вуруд аз вилоятҳо ба Тошканд 10 истгоҳи замонавӣ, инчунин дар шафати 6 истгоҳи метро бо шумораи бештари мусофирон таваққуфгоҳҳо бунёд карда шаванд.

Имсол сохтмони хатти метрополитени рӯизаминии «Куйлуқ—Қипчоқ» ба охир мерасад. Дар натиҷа барои 70 ҳазор нафар одамоне, ки аз автомобилҳои сабкурав истифода мебаранд, барои истифода бурдани нақлиёти ҷамъиятӣ шароит фароҳам оварда мешавад.

Илова бар ин, вазифа гузошта шуд, ки модели иқтисодию математикии системаи нақлиёти ҷамъиятӣ дар асоси пешгўии ҳаҷми мусофиркашонӣ барои 5 соли оянда бунёд карда, нерўи илмии Донишкадаи нақлиёт зиёд карда шавад.

Шумораи мошинҳо дар Тошканд соле 15 фоиз меафзояд, дар як шабонарӯз то 800 ҳазор автомобил дар шаҳр ҳаракат мекунад. Дар пойтахт зиёда аз 500 чорроҳаи асосӣ мавҷуд аст, ки аксари онҳо қобилияти пасти ҳаракати нақлиёт доранд. Роҳҳо барои пиёдагардон ва велосипедронҳо хуб мувофиқ карда нашудаанд. Натиҷаи ҳамин, инчунин паст будани маданияти ҳаракат дар роҳ аст, ки ҳодисаҳои роҳу нақлиёт зиёд мешаванд.

Сарвари давлат таъкид кард, ки тавассути ташкили дурусти ҳаракати нақлиёт қобилияти гузарандагӣ ва қулайии чорроҳаҳоро афзоиш дод. Имсол дар 200 чорроҳа ҷорӣ намудани системаи назорати ҳаракати нақлиёт, бунёди 2 гузаргоҳ, 180 километр роҳи пиёдагардон ва велосипедронӣ, бунёди таваққуфгоҳ барои 2000 мошин пешбинӣ шудааст.

Инчунин имсол 35 фоизи парки автобусҳо нав карда мешавад. Бо ин мақсад харидани 410 автобус ва электробусҳо пешбинӣ шуда, шумораи автобусҳои гунҷоишашон зиёд ду баробар афзун гардонда мешавад. Бо дарназардошти афзоиши шумораи мошинҳои барқӣ дар роҳҳои пойтахт зарурати таъсиси стансияҳои барқгиранда зикр гардид.

Дар ҷараёни муаррифӣ ҳамчунин имкониятҳои рушди нақлиёти ҷамъиятӣ ва инфрасохтори нақлиётӣ дар шаҳри Тошканд дар асоси таҷрибаи аз ҷиҳати илмӣ асоснокшудаи Олмон ва Русия муаррифӣ гардид.

Ба масъалаи аз ҷиҳати молиявӣ солим гардондани корхонаҳои нақлиёти ҷамъиятӣ диққати махсус дода шуд. Муҳимияти гузаронидани аудити молиявӣ ва трансформатсияи корхонаҳои «Тошшаҳартрансхизмат», афзоиши саҳми бахши хусусӣ дар соҳа қайд карда шуд.

Ба ҷуз аз маблағҳои буҷетӣ ва дигар манбаъҳо, соҳа бояд дар асоси шарикии давлатию хусусӣ рушд ёбад, – таъкид дошт роҳбари давлат.

Ба Вазорати нақлиёт ва ҳокимияти шаҳри Тошканд супориш дода шуд, ки консепсияи рушди нақлиёти ҷамъиятии пойтахтро бознигарӣ намуда, онро ба муҳокимаи васеи ҷамъиятӣ гузоранд.

Таъкид шуд, ки таҷрибаи пойтахт ва равиши илмӣ дар беҳбуди нақлиёти ҷамъиятӣ дар тамоми марказҳои вилоятӣ бо назардошти шумора, ҷойи кор ва иқомати аҳолӣ ва хусусиятҳои рушд татбиқ карда мешавад.