Дар ҷараёни музокирот таъкид гардид, ки ҳаҷми гардиши моли мутақобила байни Ӯзбекистон ва Туркия 2,4 миллиард доллари ИМА-ро ташкил додааст. Ҷонибҳо зарурати истифодаи ҳамаи имкониятҳои мавҷударо барои расонидани ин нишондиҳанда то 5 миллиард доллар таъкид намуданд, хабар медиҳад АИ «Дунё».

Аз ҷумла, муовини вазири савдои Туркия Мустафо Тузҷу қайд кард, ки барои расидан ба ҳадафҳои гузошташуда захираҳои назаррас ва имкониятҳои нав мавҷуданд. Ба гуфтаи ӯ, номенклатураи молии савдои хориҷии Ӯзбекистон ва Туркия дар бисёр мавридҳо монанд буда, маҳсулоти истеҳсолшаванда дар ҳар ду кишвар дорои рақобатпазирии баланд дар бозорҳои хориҷӣ мебошад.

Ҳамчунин зикр гардид, ки Туркия дар баробари Покистон, Озарбойҷон ва Эрон бо Ӯзбекистон низ Созишнома оид ба савдои имтиёзнокро ба имзо расонидааст. Ба андешаи ҷониби туркӣ, истифодаи самараноки иқтидори ин созишнома имкон медиҳад нақшаҳои пешбинишудао бо муваффақият амалӣ карда шаванд.

Ба масъалаҳои бартарафсозии монеаҳои тарифӣ ва ғайритарифӣ, ки содиркунандагони ватанӣ бо онҳо рӯ ба рӯ мешаванд, таваҷҷуҳи махсус зоҳир карда шуд. Аз ҷумла, имкониятҳои коҳиш додани боҷҳои иловагии воридотӣ ба маҳсулоти соҳаҳои электротехникӣ, нассоҷӣ ва кабелӣ-ноқилӣ, инчунин бекор кардани маҳдудиятҳо оид ба воридоти баъзе намудҳои маҳсулоти меваю сабзавот баррасӣ гардиданд.

Ҷонибҳо инчунин ба зарурати фаъол гардонидани фаъолияти гурӯҳи корӣ оид ба савдо таъкид намуда, оид ба баргузории ҷаласаи навбатии он тибқи тартиби муқарраргардида ба мувофиқа расиданд.

Дар ҷамъбасти вохӯрӣ ҷониби туркӣ мавҷуд будани таҷрибаи ғанӣ дар таҳия ва татбиқи созишномаҳои савдои имтиёзнок ва озодро қайд намуда, омодагии худро барои ҳамкорӣ дар ин самт тавассути тақвияти иқтидори институтсионалӣ, рушди тахассуси касбии мутахассисон ва расонидани кумаки методӣ изҳор дошт.