Дар рафти чорабинӣ Ӯзбекистон бо як овоз бо роҳи аккламатсия (пазироии ҳамаҷониба) ба сифати узви Комиссияи илм ва технология ба мақсади рушд барои солҳои 2023-2026 интихоб шуд.
Комиссия органи ёрирасони Шӯрои иқтисодӣ ва иҷтимоии СММ мебошад. Он соли 1992 бо мақсади расонидани ёрии тахассусии машваратӣ ба Ассамблеяи Генералӣ ва ШИИ оид ба масъалаҳои мубрами илмию техникӣ, инноватсия ва муҳандисӣ бо мақсади такмил додани сиёсат дар ин самт таъсис дода шудааст. Комиссия дар таҳияи тавсияҳо ва дастурҳо оид ба масъалаҳои илм ва технология дар доираи системаи умумии СММ нақши муҳим мебозад.
Комиссия аз 43 кишваре иборат аст, ки аз ҷониби аъзои ШИИ интихоб шудаанд. Котиботи Комиссия Конфронси савдо ва рушд (ЮНКТАД) - мақоми асосии Ассамблеяи Генералӣ дар соҳаи савдо, молия, технология, сармоягузорӣ ва рушди устувор мебошад. Аъзоёни комиссия дар шаҳри Женева ҷамъ меоянд.
Кишварҳои тозаинтихобшуда, аз ҷумла Ӯзбекистон аз 1 январи соли 2023 ба ҳайати Комиссия шомил мешаванд.
Ба мамлакати мо додани имконияти иштирок дар кори ин мақомоти асосии СММ далели равшан ва эътирофи дастгирии васеи ҷомеаи ҷаҳонӣ аз тадбирҳои собитқадамонаи мо дар соҳаи тараққиёти илм ва техника мебошад. Ин ҳам ба даъвати Президент Шавкат Мирзиёев оид ба аҳамияти таҳия ва татбиқи самтҳои афзалиятноки рушди илму техника бо дарназардошти ҳадафҳои рушди иҷтимоию иқтисодӣ, иҷтимоию сиёсии давлати мо ва ноил шудан ба ҳадафҳои муосири илм комилан мувофиқ аст. Ҷалби фаъолии Ўзбекистон ба фаъолияти Комиссия ба сифати узви он имкони боз ҳам амиқ шинос шуданро бо таҷрибаи ғанишуда ва усулҳои пешқадами коркард, нақшагирӣ ва пешгӯии тамоюлҳои муҳими ҷаҳонӣ дар соҳаи илм, техника ва инноватсия фароҳам меорад. Ин махсусан дар шароити таҳким ва нигоҳ доштани рақобатпазирии кишвари мо дар иқтисоди ҷаҳонӣ ва таъмини рушди устувори ҷумҳурии мо муҳим аст, хабар медиҳад АИ «Дунё».
Бешубҳа, Ӯзбекистон узви Комиссияи ШИИ буда, дар кори ин ниҳод саҳми бузург хоҳад гузошт. Дар навбати худ, узвият ба ин сохтори муҳим ба татбиқи босуръати Рӯзномаи то соли 2030 аз ҷониби Ӯзбекистон, ҷалб ва татбиқи қарорҳои инноватсионӣ барои рушди илмию техникӣ ва иҷтимоию иқтисодии ҷумҳурӣ, инчунин афзоиши нерӯи интеллектуалӣ ва технологии давлати мо мусоидат хоҳад кард.
