Зимни гуфтушунидҳо вазирон хусусияти фаъол ва динамикии муносибатҳои дуҷонибаро қайд намуда, инчунин ҷадвали чорабиниҳо ва мулоқотҳои дарпешистода дар сатҳи олиро баррасӣ намуданд, хабар медиҳад дафтари матбуоти Вазорати корҳои хориҷии Туркманистон.

Дипломатҳо якдилона бар ин назар буданд, ки ба шарофати иродаи сиёсии сарони Туркманистон ва Ӯзбекистон ду давлати бародар ҳамкориҳои гуногунҷанбаи пурсамар ва муассирро дар бахшҳои гуногун ба роҳ монда истодаанд.

Ҳамзамон, саҳми шахсии Пешвои миллии халқи туркман, Раиси Халқ Маслаҳатии Туркманистон дар ин самт махсусан таъкид гардид.

Дар баробари ин, фаъолияти бахшҳои сиёсати хориҷии ду кишвар ба унвони яке аз ҳалқаҳои калидӣ дар таҳкими равобити Туркманистону Ӯзбекистон таъкид шудааст.

Ҷонибҳо дар бораи аҳамияти ҳамкории зич доир ба масъалаҳои минтақавӣ сухан ронда, аҳамияти ҳамоиши сеҷониба дар Ашқободро, ки моҳи августи соли равон бо иштироки сарони Туркманистон, Ӯзбекистон ва Тоҷикистон баргузор шуд, қайд карданд, ки ба рушди минбаъдаи ҳамкории минтақавии кишварҳои иштирокдор такони нав бахшид.

Вазирон сатҳи баланди ҳусни тафоҳум байни ҷонибҳо ва шабоҳати мавқеъҳоро дар чаҳорчӯби фаъолиятҳо дар платформаҳои байналмилалӣ, пеш аз ҳама дар СММ қайд карданд. Ба ин муносибат ба ҷониби Ӯзбекистон барои дастгирии ташаббусҳои байналмилалии Туркманистон изҳори сипос карда шуд. Дипломатҳо ҳамчунин аҳамияти форматҳои ҳамкориҳои “ОМ+”, аз ҷумла Мулоқоти вазирони корҳои хориҷии кишварҳои Осиёи Марказӣ ва Дабири кулли САҲА-ро, ки имрӯз дар Ашқобод баргузор шуданд, қайд карданд.