Хусусигардонӣ яке аз тадбирҳои муҳими иқтисодист, ки на танҳо даромади буҷетро таъмин мекунад, балки ҳамчун асос барои татбиқи лоиҳаҳои нави инвеститсионӣ, ташкили ҷойҳои нави корӣ ва истеҳсоли маҳсулоти арзиши иловашуда хидмат мекунад. Мавҷудияти замин, биноҳо ва инфрасохтор шарти зарурии рушди соҳибкорӣ мебошад.
Аз ин рӯ масъалаи хусусигардонӣ яке аз самтҳои асосии ислоҳоти иқтисодӣ муайян карда шудааст. Корҳо ҷиҳати камаш 3 маротиба кам кардани шумораи корхонаҳои дорои саҳми давлатӣ дар солҳои ҷорӣ ва оянда идома доранд. Ин дигаргуниҳо аз ҷониби коршиносон ва расонаҳои бонуфузи ҷаҳон ба таври васеъ эътироф карда мешаванд.
27 октябри соли 2020 Фармони Президенти Ҷумҳурии Ӯзбекистон "Дар бораи чораҳои ислоҳоти босуръати корхонаҳо бо иштироки давлат ва хусусигардонии дороиҳои давлатӣ" қабул карда шуд. Дар нимсолаи аввали соли равон 478 объекти амволи давлатӣ ба маблағи 1 триллиону 100 миллиард сӯм фурӯхта шуд.
Бо вуҷуди ин, корҳои зиёде бояд анҷом дода шаванд. Аз ҷумла, аз 556 объекти барои фурӯш пешбинишуда то ҳол 288 адад ба савдои музояда гузошта нашудааст. Ғайр аз ин, 511 объекти дар ихтиёри корхонаҳо ва бонкҳо бо иштироки давлат, ки ба фаъолияти асосии онҳо марбут нестанд, ҳанӯз фурӯхта нашудаанд.
Дар ҷаласа вазифаҳои ташкили самараноки раванди хусусигардонӣ, соддагардонии тартиби иштирок дар савдоҳои музояда ва тавсеаи дастрасӣ ба онҳо баррасӣ шуданд.
Зикр гардид, ки имсол беш аз 900 объекти давлатӣ ба фурӯш гузошта мешаванд. Амалияи фурӯши амволи давлатӣ бо нархи ибтидоии "1 сӯм", фурӯши қитъаҳои замин бо ӯҳдадории инвеститсионӣ бекор карда шуда, объектҳо бо нархи бозорӣ ба савдоҳои электронӣ гузошта мешаванд.
Ғайр аз он, ҳаққи иштирок дар музоядаи онлайн бекор карда, хароҷоти соҳибкорон барои бақайдгирии электронӣ аз ҷониби Агентии идораи дороиҳои давлатӣ пардохта мешавад. Ҳангоми хариди амволи ғайриманқул дар музояда мӯҳлати пардохт аз 5 рӯзи ҷорӣ то 15 рӯз тамдид карда мешавад.
Тартибе ҷорӣ карда мешавад, ки тибқи он фурӯш ва иҷораи биноҳо ва воситаҳои нақлиёти ташкилотҳое, ки ҳиссаи давлаташон зиёда аз 50 фоизро ташкил медиҳад, танҳо тавассути савдои музоядаи электронӣ сурат мегиранд.
Ба шахсони масъул супориш дода шуд, ки лоиҳаи қарореро таҳия кунанд, ки ин тартиби навро пешбинӣ мекунад.
Зарурияти бо ҷалби мушовирони хориҷӣ ба фурӯш гузоштани саҳмияҳои давлатӣ дар 13 объекти бузурги амволи ғайриманқули Тошканд ва 11 корхонаи саноатӣ таъкид карда шуд.
Ба ҳокимони вилоятҳо, ноҳияҳо ва шаҳрҳо супориш дода шуд, ки дар тӯли як моҳ 154 объекти холии тобеи онҳоро ба фурӯш бароранд.
Ҳиссаи маблағҳое, ки дар ихтиёри минтақаҳо пас аз фурӯши амволи ба музояда гузоштаи ҳокимият мононда мешаванд, аз 73 то 87 фоиз зиёд карда мешаванд. Ин маблағҳо дар байни буҷетҳои вилоятӣ ва ноҳиявӣ (шаҳрӣ) баробар тақсим карда мешаванд.
Ба Агентии идоракунии дороиҳои давлатӣ супориш дода шуд, ки инвентаризатсияи пурраи объектҳои ғайрисоҳавӣ ва холии корхонаҳо ва бонкҳоро бо иштироки давлат дубора гузаронида, онҳоро ба хусусигардонӣ омода созад.
Таклифҳо оид ба солимгардонии молиявӣ ва модернизатсияи корхонаҳои бекор ё зиёновар муҳокима шуданд.
