Ayni damda AOKAda Oliy va o'rta muaxsus ta'lim vaziri o'rinbosari Rahimjon Hakimov boshchiligidagi mutasaddilar ishtirokida matbuot anjumani davom etyapti.
Unda oliy ta'lim muassasalarida ilmiy-tadqiqot faoliyati samaradorligini oshirish yuzasidan amalga oshirilgan ishlar va istiqboldagi rejalar yuzasidan tahliliy ma'lumot berilmoqda.
OTMda 2021-yakunlariga ko'ra, 80,5 mlrd so'mlik xo'jalik shartnomalari bajarildi va bu ko'rsatkich 2017-yilga nisbatan deyarli etti baravarga oshirildi (ya'ni, 2017-yilda 11,9 mlrd so'mga teng xo'jalik shartnomalari bajarilgan).
Xalqaro loyihalarni amalga oshirish ko'lami sezilarli darajada oshmoqda jumladan, 2017-yilda 13,23 mln AQSH dollariga teng xalqaro loyihalar bajarilgan bo'lsa, 2021-yil yakunlariga ko'ra, mazkur loyihalar qiymati 72,8 mln AQSH dollariga etkazilgan.
Shuningdek, 2017-yilga qadar OTMda startap loyihalari asosida yangi mahsulotlar va texnika-texnologiyalarni tijoratlashtirish maqsadida hozirda 14 ta OTM huzurida ilmiy-tadqiqot natijalarini amaliyotga joriy etishga ko'maklashuvchi “Biznes-akseleratorlar”, 40 ta OTMda 47 ta “Inkubatsiya markazlari” faoliyat yuritmoqda, deb yozmoqda Oliy va o'rta maxsus ta'lim vazirligi matbuot xizmati.