Ozarbayjon Prezidentining matbuot xizmati uchrashuvdan mamlakatlar rahbarlarining qo'l berib ko'rishgani aks etgan suratlarni e'lon qildi. Armaniston Bosh vaziri matbuot kotibi Nazeli Bagdasaryan uchrashuv Armaniston va Ozarbayjon o'rtasidagi tinchlik jarayoni doirasida o'tayotganini ta'kidladi.
Muzokaralarda Yerevandan Bosh vazir o'rinbosari Mger Grigoryan, Xavfsizlik kengashi kotibi Armen Grigoryan, tashqi ishlar vaziri Ararat Mirzoyan va Armaniston Respublikasi Milliy kengashi vitse-spikeri Ruben Rubinyan ishtirok etmoqda. Bokudan yig'ilishda Ozarbayjon tashqi ishlar vaziri Jeyhun Bayramov, Bosh vazir o'rinbosari Shahin Mustafoyev va Ozarbayjon Prezidenti maslahatchisi Hikmet Gadjiyev qatnashmoqda.
Ozarbayjon va Armaniston o'rtasida tinchlik shartnomasi bo'yicha muzokaralar bir necha yillardan beri davom etmoqda, biroq unga tayyorgarlik 2022-yilda faollashdi. 2025-yilning mart oyida ikki davlat tashqi ishlar vazirliklari tinchlik shartnomasi imzolashga tayyorligini e'lon qildi. Armaniston Bosh vazirining ta'kidlashicha, hujjat muhokamalarning butun davri davomida “sezilarli evolyutsiya”dan o'tgan. Ozarbayjon Prezidenti “Janubiy Kavkazda tinchlik o'rnatish” vaqti kelganini aytdi.
Hujjat hali rasman e'lon qilinmagan, biroq unda 17 ta modda borligi ma'lum. Shartnomada Armaniston va Ozarbayjon bir-birining hududiy yaxlitligi va chegaralarining daxlsizligini tan oladi va shu asosda chegaralarini delimitatsiya va demarkatsiya qiladi. O'tgan bir oy ichida Boku va Yerevan chegara bo'ylab uchinchi davlat qo'shinlari kiritilmagani va xalqaro sudlardan o'zaro da'volarni qaytarib olishni tasdiqlovchi ikkita muhim modda bo'yicha kelishib olishdi. Tomonlar, shuningdek, kelishuv imzolanishidan oldin mavjud bo'lgan bahsli masalalar bo'yicha sudga da'vo qo'zg'atmaslikka kelishib olishdi, deb xabar beradi rbc.ru.
