Barqaror rivojlanish maqsadlariga erishishda Oʻzbekiston tajribasi BMT tomonidan yuksak baholandi

Xalqaro hamkorlik 25 avg 2023, 20:19 1 196

Kuni kecha Senatning Xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qoʻmitasi raisi R.Alimov BMT Yevropa va Markaziy Osiyo uchun rivojlanish boʻyicha mintaqaviy muvofiqlashtirish ofisi rahbari Gvi Yop Son bilan uchrashdi.

Muloqot davomida Oʻzbekiston Respublikasining BMT bilan hamkorlikning hozirgi holati va istiqbollari muhokama etildi.

Uchrashuv davomida barqaror rivojlanish sohasidagi milliy maqsad va vazifalarga oʻz vaqtida erishish borasida olib borilayotgan islohotlar, qabul qilinayotgan qonunlar, strategiyalar va davlat dasturlarining milliy maqsad va vazifalarga mosligi nuqtai nazaridan koʻrib chiqilishi, shuningdek, sohada olib borilayotgan samarali parlament nazorati toʻgʻrisida batafsil toʻxtalib oʻtildi. Oʻzbekistonning barqaror rivojlanish maqsadlari boʻyicha tajribasi butun dunyoga namuna sifatida taqdim etilayotganligi alohida taʼkidlandi.

Suhbat chogʻida 2023-yil oktyabr oyida oʻtkazilishi rejalashtirilayotgan “Barqaror rivojlanish maqsadlariga erishishda parlamentlararo hamkorlik” mavzusidagi II Global forumga tayyorgarlik yuzasidan fikr almashildi, deb xabar beradi Oliy Majlis Senati matbuot xizmati.