G'azo sektori shimoliga 50 kundan ortiq vaqtdan buyon deyarli hech qanday oziq-ovqat yetib bormayapti. BMTning Jahon oziq-ovqat dasturining (WFP) Falastin hududlari bo'yicha direktori Antuan Renarning so'zlariga ko'ra, G'azodagi vayronagarchilik va ocharchilik darajasi har qachongidan ham yomonroq.

“Odamlar endi vaziyatga dosh berolmaydi. Oziq-ovqat deyarli kirmayapti, bozorlar bo'm-bo'sh. Noyabr oyida 815 mingga yaqin odam WFP tomonidan oziq-ovqat yordami oldi, bu esa muhtojlarning deyarli yarmini tashkil etadi”, dedi u, tashkilotning X ijtimoiy tarmog'idagi sahifasida e'lon qilingan videorolikda.

Uning hisob-kitoblariga ko'ra, Falastinda 2,2 millionga yaqin aholi o'tkir oziq-ovqat yetishmovchiligini boshdan kechirmoqda, deb xabar beradi tass.ru.