Chunki mazkur uchrashuv asnosida Oʻzbekiston — AQSH munosabatlarida yangi sahifa ochildi. Bu nafaqat ikki davlat oʻrtasidagi muloqotning yangi bosqichi, balki strategik sheriklikni yanada chuqurlashtirish yoʻlidagi muhim qadam sifatida tarixga kirdi. Oʻzbekiston va AQSH yetakchilarining yuzma-yuz muloqoti, tom maʼnoda, ikki xalq kelajagiga yoʻnaltirilgan, dunyo siyosiy maydonida katta ahamiyat kasb etgan voqea boʻldi.

Davlatimiz rahbari BMT Bosh As­sambleyasi sessiyasidagi nutqi davomi­da qator ustuvor yoʻnalishlarga toʻxtal­di.

Birinchisi, tinchlik va xavfsiz­lik masalasi. Prezidentimiz global xavfsizlik muammolari, yangi tahdid va chaqiriqlar sharoitida davlatlar oʻrtasi­da ishonch va hamkorlikni mustahkamlash zarurligini qayd etdi. Oʻzbekiston har doim tinchlikparvar siyosatga sodiq ekani va mintaqaviy barqarorlikka oʻz hissasi­ni qoʻshishini taʼkidladi.

Ikkinchisi, inson huquqlari va demokratiya. Inson huquq va erkinliklari­ni himoya qilish, jamiyatda adolat va qonun ustuvorligini taʼminlash masalalari nutq­dan alohida oʻrin oldi. Yangi Oʻzbekistonda­gi islohotlar inson qadrini ulugʻlash ta­moyili asosida amalga oshirilayotgani dunyo hamjamiyatiga yana bir namoyish qilindi.

Uchinchisi, barqaror taraqqiyot va iq­lim masalalari. Ekologik muammolar, ayniqsa, Orol fojiasi va oqibatlari dunyo uchun ogʻriqli masala sifatida koʻtarildi. Shu bilan birga, iqlim oʻzgarishlariga qar­shi kurashda barcha davlatlar birlashishi lo­zimligi taʼkidlandi.

Toʻrtinchisi, yoshlar va taʼlim. Dav­latimiz rahbari yoshlar masalasiga ham alohida eʼtibor qaratdi. Yangi Oʻzbekistonning asosiy boyligi yoshlar ekani, ularning salohiyatini yuzaga chiqarish, bilimi va salohiyatidan samarali foy­dalanish orqali barqaror taraqqiyotga erishish mumkinligi aytildi. Shu maʼ­noda, xalqaro yoshlar hamkorligini ku­chaytirish taklif etildi.

Beshinchisi, xalqaro hamkorlik va hamjihatlik. Nutqdagi yana bir muhim jihat — global muammolarni yechishda dav­latlarning oʻzaro hamkorligi va hamjihat­ligi zarurligi haqidagi fikrlardir. Mil­liy yoki mintaqaviy manfaatlar emas, balki butun insoniyat taqdiri ustuvor boʻlishi kerakligi taʼkidlandi.

Prezidentimiz nutqi insoniyat oldida turgan dolzarb masalalarni hal qilishda Oʻzbekistonning izchil pozitsiyasini va glo­bal tashabbuskorligini namoyon etdi.

Tashrif doirasida savdo-iqtisodiy va madaniy-gumanitar hamkorlikni kengayti­rish masalalari yuzasidan turli uchrashuvlar ham boʻlib oʻtdi. Xususan, Prezidentimiz AQSHda istiqomat qilayotgan vatandoshlar, shuningdek, “El-yurt umidi” jamgʻarmasi stipendiatlari bilan samimiy uchrashuv oʻtkazdi. Bu muloqot nafaqat maʼnaviy quv­vat manbai, balki yangi Oʻzbekiston — yangi imkoniyatlar mamlakati ekanining amaldagi tasdigʻi boʻldi.

Suhbatning asosiy maqsadi oʻzi uzoqda boʻlsa-da, yurt taqdiriga befarq boʻlmagan farzandlar qalbini Vatanga bogʻlash, ular­ni yangi taraqqiyot jarayonlariga faol jalb etish edi. Prezidentimiz yoshlarga samimiy mehr va yuksak ishonch bildirdi, ularning bilimi va tajribasi mamlakatimiz ta­raqqiyoti uchun juda zarur ekanini taʼkid­ladi.

Uchrashuvda qayd etilganidek, 500 dan ziyod stipendiatning AQSHda tahsil olayot­gani mamlakatimizda ilm-fan, taʼlim va kadrlar salohiyatini oshirishga qaratilgan eʼtibor samarasidir. Bu avlod ertaga Vatan taraqqiyotining tayanchi va yetakchi kuchi boʻli­shi kutilmoqda.

Shu bilan birga, muloqot ramziy jihat­dan ham katta ahamiyatga ega. Dunyoning qaysi burchagida boʻlmasin, Oʻzbekiston farzandla­ri hamisha Vatan mehri va davlat gʻamxoʻrli­gi doirasidan tashqarida emasligini koʻr­satdi.

Prezidentimizning AQSHga tashrifi doirasida oʻtkazilgan uchrashuvlar nafaqat siyosiy va diplomatik, balki iqtisodiy va innovatsion hamkorlik masalalarini ham yangi pogʻonaga olib chiqdi. Suhbatlar chogʻida ikki davlat oʻrtasidagi strategik sheriklikning kelgusi yoʻnalishlari belgilab olindi.

Ayniqsa, milliy iqtisodiyotga AQSH­ning ilgʻor tajribasi va zamonaviy texnolo­giyalarini joriy qilish masalasi alohida ahamiyat kasb etdi. Xususan, investitsiyaviy muhitni yanada ochiq va raqobatbardosh etish, qoʻshma loyihalar orqali yangi ish oʻrinlari ochish, shuningdek, elektron savdo maydon­lari — marketpleyslarni rivojlantirish masalalari muhokama etildi.

Shu bilan birga, tibbiyot, transport va logistika sohalarida innovatsiyalarni qoʻl­lash, raqamli yechimlarni joriy etish hamda yuqori texnologiyali sohalarda qoʻshma dasturlarni amalga oshirish ikki tomonlama hamkorlikning istiqbolli yoʻnalishlari sifatida belgilandi. Xususan, AQSHning tibbiyot sohasidagi ilgʻor tajribasini Oʻz­bekiston klinikalariga joriy etish orqali zamonaviy diagnostika va davolash stan­dartlari keng qoʻllanishi koʻzda tutilmoqda.

Bu tashabbuslar, avvalo, Oʻzbekiston iqtisodiyotining global bozordagi raqo­batbardoshligini kuchaytirish, shuningdek, mamlakatimizda yangi innovatsion muhitni shakllantirishga xizmat qiladi. Shu ta­riqa AQSH bilan iqtisodiy va innovatsion sheriklik mamlakatimiz taraqqiyotining strategik ustuvor yoʻnalishlaridan biri si­fatida namoyon boʻlmoqda.

AQSH bilan hamkorlik doirasidagi ushbu tashabbuslar oliy taʼlim uchun ham ulkan imkoniyatlar eshigini ochadi. Avvalo, ilgʻor texnologiyalarni taʼlim jarayoniga joriy qilish, AKT va innovatsion pedago­gika sohalarida qoʻshma dasturlarni amalga oshirish imkoniyati paydo boʻladi. Shu orqa­li Oʻzbekistonda pedagogika yoʻnalishidagi oliy taʼlim muassasalari talabalari va professor-oʻqituvchilari xalqaro tajriba­dan bevosita bahramand boʻlishi, ilm-fan natijalarini iqtisodiy amaliyot bilan bogʻlay olishi mumkin.

Prezidentimizning BMT minbarida soʻzlagan nutqini katta qiziqish bilan kuzatdik. Chunki unda koʻtarilgan masa­lalar — tinchlik va barqaror taraqqiyot, inson huquqlari, yoshlar va taʼlimga oid gʻoyalar — aynan universitetimizdagi taʼlim-tarbiya ishlari bilan chambarchas bogʻliq.

Oʻzbekiston yetakchisining global tashabbuslari, ayniqsa, yoshlar siyosati va taʼlim sohasiga doir fikrlari universi­tetimiz rivoji uchun muhim dasturulamal vazifasini oʻtaydi. Professor-oʻqituv­chilar va talabalar faoliyatini aynan shu gʻoyalar asosida yoʻnaltirib, yangi avlod pedagog va murabbiylarini tarbiyalashni maqsad qilgan.

Shu bilan birga, nutqda taʼkidlangan barqaror taraqqiyot va ekologiyaga oid ma­salalar, jumladan, Orolboʻyi muammosiga doir tashabbuslar ham universitetimizda oʻtkazilayotgan ilmiy tadqiqotlar va maʼ­naviy-maʼrifiy ishlarda muhim ahamiyat kasb etmoqda. Chunki kelajak avlodga sogʻlom muhit, tinch va farovon mamlakat qoldirish taʼlim muassasalarining ham umumiy burchidir.

Prezidentimizning Nyu-Yorkka tashri­fi, tarixiy uchrashuvi va muloqotlari yangi Oʻzbekistonning xalqaro maydondagi nu­fuzini yangi pogʻonaga koʻtardi. BMT min­barida yangragan tashabbuslar, uchrashuvlar va vatandoshlar bilan samimiy muloqot — barchasi yangi Oʻzbekistonning dunyo hamja­miyatida muhim va munosib oʻrin egallayotga­nini yaqqol namoyon etdi.

Maqsud YULDOSHEV,

Jizzax davlat pedagogika universiteti rektori, professor

Hamkorlik materiali