Neft tranziti 18 foizga qisqardi.
Yamandagi husiylarning Qizil dengizdagi kemalarga hujumi Suvaysh kanali orqali olib boriladigan savdoga katta ta'sir ko'rsatdi. Birlashgan Millatlar Tashkilotining savdo va taraqqiyot konferensiyasi eksperti Yan Xoffmanning aytishicha, kanal orqali savdo so'nggi ikki oy ichida 42 foizga kamaydi. “Biz Qizil dengizdagi kemalarga qilingan hujumlardan juda xavotirdamiz”, dedi u.
Qizil dengiz va Suvaysh kanali jahon savdosining markaziy savdo yo'li hisoblanadi. Har yili Suvaysh kanali orqali 20 mingga yaqin kemalar o'tadi. Yamanlik isyonchilarning hujumlari tufayli ko'plab yirik yuk tashish kompaniyalari bu yo'ldan o'tmaslikka qaror qilishdi. Osiyo va Yevropa o'rtasidagi yo'lda konteyner tashuvchi kemalar Afrikaning janubiy nuqtasini aylanib o'tishlari kerak, bu esa sezilarli darajada ko'proq vaqt va yuz minglab yevro miqdoridagi qo'shimcha yoqilg'i xarajatlarini talab qiladi, deb xabar beradi dw.com.