Bu BMTTDning Oʻzbekistondagi vakolatxonasi matbuot xizmati xabar berdi.

Loyihaning ikkinchi bosqichi 2024−2028-yillarda Samarqand, Qashqadaryo va Surxondaryo viloyatlarining 21 ta tumanidagi 157 ta mahallada ijtimoiy infratuzilma obyektlarini qurish va kapital taʼmirlashni nazarda tutadi.

Islom taraqqiyot dasturining moliyaviy koʻmagida amalga oshiriladigan mazkur loyiha qiymati 293,5 million dollarni tashkil etadi.

“Loyiha yoʻl-transport infratuzilmasi, muhandislik-kommunikatsiya tarmoqlari, elektr taʼminoti tizimlarini yaxshilash, bolalar bogʻchalari, maktablar va qishloq poliklinikalari kabi ijtimoiy soha obyektlarini qurish va rekonstruksiya qilishda resurs tejovchi va ekologik toza texnologiyalarni qoʻllash orqali qishloq aholisining turmush darajasini oshirishga qaratilgan”, — deyiladi xabarda.

Shuningdek, tegishli yashil va energiya tejamkor, shuningdek, raqamli yechimlardan foydalangan holda qishloqlarni rivojlantirish rejalarini ishlab chiqish va ularni amalga oshirishda mahalliy arxitektorlar, muhandislar va mahalliy hokimiyat organlarining imkoniyatlarini kengaytirish va kuchaytirish rejalashtirilgan.

Loyihani amalga oshirish natijasida 622 mingdan ortiq qishloq aholisining turmush sharoitini yaxshilash rejalashtirilgan.

Loyihaning 2022-yildan hozirgacha amal qilgan birinchi bosqichi ham xuddi shunday vazifalarni oʻz ichiga olgan boʻlib, Qoraqalpogʻiston, Xorazm, Buxoro va Navoiy viloyatlarining 20 ta maqsadli tumanidagi 170 ta mahalla fuqarolar yigʻinida yashaydigan qishloq aholisining turmush sifatini yaxshilash, shuningdek, aholining kasbiy malakasini oshirish uchun chekka qishloqlarda ham obyektlarni qurish va taʼmirlashni qamrab olgan. Ayni paytda mahalliy aholining faol ishtirokida 2024−2025-yillarda quriladigan yoki rekonstruksiya qilinadigan 900 ta kichik loyiha tanlab olingan.