Unga koʻra, yomgʻir va oqova suvlardan hamda suv tejovchi texnologiyalardan samarali foydalanishga qaratilgan zamonaviy sugʻorish tizimi yoʻlga qoʻyiladi. Tizimni 32 ta shaharda 64 ta mahallada tashkil qilish koʻzda tutilgan.
Amalga oshirish mexanizmi
Loyihaga koʻra, yomgʻir va oqova suvdan foydalanishning texnik va gigiyenik standartlari ishlab chiqiladi. Tajriba sifatida 500 kvadrat metrdan ortiq koʻp qavatli uylar, yangi qurilayotgan bino va ijtimoiy soha obyektlarida yomgʻir suvini yigʻish sinovdan oʻtkaziladi. Shuningdek, sanoat va ishlab chiqarish korxonalarida yomgʻir va oqova suvlarni yigʻish va ulardan samarali foydalanish yoʻlga qoʻyiladi.
Bundan tashqari, “Yashil makon” loyihasi doirasida barpo etilayotgan yashil hududlarda (“Yashil bogʻ”, “Yashil jamoat istirohat bogʻ”lari hamda “Yashil qoplamalar”) hamda koʻp qavatli uylarga tutash hududlarda ekilgan daraxt va butalarni sugʻorishda zamonaviy tizimdan foydalaniladi.
Afzalliklari
Kislota va ishqorning neytral balansiga ega, mikroelement va kislorodga boy yomgʻir suvi uylar tomidan plastik sigʻimlarga yigʻiladi. Sigʻimlar suvni uzoq vaqt saqlash uchun yer ostiga joylashtiriladi. Soʻng nasoslar bilan tomchilatib sugʻorish tizimi orqali koʻchatlarni sugʻorishga yoʻnaltiriladi. Har bir uyda yiliga 20-40 tonna yomgʻir suvini yigʻish evaziga 30 tadan 60 tagacha daraxtlarni suv bilan taʼminlash imkoniyati yaratiladi.
Xalqaro tajriba
Bugungi kunda bir qator xorijiy davlatlarda yomgʻir suvlaridan samarali foydalanish yoʻlga qoʻyilgan. Jumladan, Turkiyada 2 ming kvadrat metrdan ortiq koʻp qavatli uylar hamda yangi qurilayotgan binolarda yomgʻir suvini yigʻish tartibi belgilangan. Germaniyadagi Frankfurt aeroportida esa yigʻilgan yomgʻir suvi aeroportning koʻkalamzorlashtirilgan hududlarining 60 foizini sugʻorish va texnik suv oʻrnini qoplash imkonini beradi.
Qolaversa, Hindistonda ham yomgʻir suvlaridan sugʻorish maqsadlarida keng foydalaniladi.
Kutilayotgan natijalar
Zamonaviy sugʻorish tizimi mamlakatda “yashil maydon”larni sezilarli koʻpaytirishga, ularni barqaror saqlashga xizmat qiladi.
Shuningdek, qishloq xoʻjaligi, sanoat va maishiy sohada foydalanilgan oqova va chiqindi suvlarni tozalab, qayta foydalanishga kiritish choralarini koʻrish oʻz navbatida suvdan foydalanish samaradorligini oshiradi.
