“Yuksalish” umummilliy harakati mutaxassislari Ijtimoiy-iqtisodiy tashabbuslar instituti ekspertlari bilan hamkorlikda davlat tuzilmalari va tashkilotlaridagi rahbar ayollar roʻyxatini yangiladi.
Rahbar ayollarning kuchli qirqtaligiga bir necha nodavlat tuzilmalari vakilalari ham kiritildi. Zero, ular davlat siyosatini shakllantirishda va qarorlar qabul qilishda faol ishtirok etmoqda.
Oʻrganish natijalari mamlakatimizda tuzilmaviy va institutsional oʻzgarishlar izchil davom etayotganini, gender tenglik sohasidagi qonunchilik takomillashtirilayotganini, xotin-qizlarning ijtimoiy-siyosiy hayotdagi oʻrni va mavqei ortib borayotganini tasdiqlaydi.
Siyosiy partiyalarda xotin-qizlar ulushi 47 foizga, oliy taʻlimda 40 foizga, tadbirkorlik faoliyatida esa 37 foizga yetdi. Rahbar lavozimlarda ishlayotgan ayollar ulushi — 33 foiz. Bugungi kunda 2 mingga yaqin davlat va jamoat tashkilotlariga ayollar rahbarlik qilmoqda.
Bundan tashqari, mamlakat Senatini ayol kishi boshqarmoqda. 2021-yilda Oʻzbekiston tarixida birinchi marta milliy parlamentdagi xotin-qizlar soni qariyb 32 foizga yetdi (deyarli ikki baravar oʻsgan). Ushbu koʻrsatkich boʻyicha dunyodagi 190 ta parlament orasida 37-oʻringa koʻtarildi.
