Tadbirda takomillashtirilayotgan “Oʻzbekiston – 2030” strategiyasi hamda “Mahallani rivojlantirish va jamiyatni yuksaltirish” yiliga oid Davlat dasturi loyihalari jamoatchilik muhokamasiga qoʻyildi.
Anjumanda Oliy sud, Bosh prokuratura, Ichki ishlar vazirligi masʼullari, siyosiy partiyalar faollari va ekspertlar ishtirok etib, yangi davrdagi islohotlarning ustuvor vazifalarini taqdim etdilar.
Sud-huquq tizimida yangi koʻrsatkichlar Oliy sud vakili taʼkidlaganidek, kelgusida sud-huquq islohotlarining bosh mezoni inson huquqlarini himoya qilish boʻladi. Dastur loyihasida quyidagi aniq maqsadlar belgilangan:
- Ozodlikdan mahrum qilish jazosini tayinlash amaliyotini 30 foizdan 20 foizga tushirish;
- Protsessual harakatlarni masofadan turib amalga oshirish imkoniyatini 50 foizga oshirish;
- Nizolarni sudga qadar hal etish samaradorligini 50 foizga yetkazish va natijada sudlarga kelib tushadigan ishlar yukini ikki barobarga kamaytirish.
Raqamli texnologiyalar va Sunʼiy intellekt Bosh prokuratura vakili oʻz nutqida ijro tizimiga zamonaviy texnologiyalarni joriy etish masalasiga toʻxtaldi. Xususan, sud va boshqa organ hujjatlari ijrosi jarayoniga “Sunʼiy intellekt” texnologiyalari tatbiq etiladi. Bu orqali ijro ishlarining 30 foizini hech qanday majburlov choralarini qoʻllamagan holda amalga oshirish tizimi yoʻlga qoʻyilishi koʻzda tutilgan.
Jamiyat va boshqaruvda transformatsiya Yangilanayotgan strategiyada davlat boshqaruvini xalq manfaatlariga xizmat qiluvchi ochiq tizimga aylantirish, korrupsiyaga qarshi kurashish va advokatura institutini kuchaytirish ustuvor vazifa etib belgilangan. Islohotlarning asosiy maqsadi — mahalla darajasidagi rivojlanish orqali umumiy jamiyat yuksalishiga erishishdir.
Hozirda Davlat dasturi loyihasi yuzasidan jamoatchilik muhokamalari davom etmoqda va fuqarolar oʻz takliflarini bildirishlari mumkin.
