Uchrashuvda Davlat ekologiya qoʻmitasi va Global yashil taraqqiyot instituti oʻrtasida oʻzaro anglashuv memorandumi imzolanishi toʻgʻrisida kelishildi. Shuningdek, hamkorlikning dastlabki qadami sifatida KOICA agentligi koʻmagida qiymati 5.6 mln. AQSH doll. boʻlgan “Qoraqalpogʻiston Respublikasida Orol dengizi inqirozining oqibatlarini bartaraf etishga qaratilgan «Yashil tiklanishga investitsiya” qoʻshma loyihasini amalga oshirish muhokama qilindi.
Oʻz navbatida Janob Pan Gi Mun mamlakatimizga tashrifi davomida Orol inqirozi nafaqat mintaqa, balki global miqyosdagi ekologik fojea ekanligiga shaxsan oʻzi guvoh boʻlganligini, muammoning atrof-muhit, aholi sogʻligʻiga taʼsirini kamaytirishga yoʻnaltirilgan ishlarda xalqaro hamkorlik muhimligini hamda davlatimiz rahbari tomonidan BMT Bosh assambleyasining 75-sessiyasida ilgari surgan muhim tashabbuslarni mamnuniyat bilan qabul qilganligini taʼkidlab oʻtdi.
Uchrashuv qatnashchilariga Prezidentimiz Shavkat Mirziyoyev tashabbusi bilan Orolboʻyi mintaqasida olib borilayotgan keng qamrovli ishlar yuzasidan axborot berildi, “Orolboʻyi – ekologik innovatsiyalar va texnologiyalar hududi” nomli kitob Koreya tomoniga taqdim etildi.
Davlat ekologiya qoʻmitasi axborot xizmati
