Tashkilot bosh direktori Tedros Gebreyesusning soʻzlariga koʻra, AQSH va Yevropada omikron shtammining BA.4 va BA.5 subvariantlari ustunlik qilmoqda, ayni paytda yangi kichik turlar ham aniqlanmoqda.
Omikronning BA.2.75 kichik turi Hindistonda aniqlangan, mutaxassislar uni kuzatmoqda, dedi JSST rahbari.
“Global miqyosda oʻtkazilgan koronavirus testlari soni keskin kamaydi, — dedi Tedros Gebreyesus. — Bu koronavirus rivojlanishining haqiqiy manzarasini yashiradi va odamlar ogʻir kechishining oldini olish uchun oʻz vaqtida davolanmayotganini bildiradi”.
Hozirgi global koronavirus holatini yana bir nechta tendensiyalar xarakterlaydi:
emlash jiddiy kasallik va oʻlimning oldini olishning haqiqatan ham samarali vositasi boʻlib qolmoqda. JSST, ayniqsa, xavf guruhlarida (tibbiyot xodimlari, keksalar, surunkali kasalliklarga chalinganlar) buster vaksinatsiyaning ahamiyatini taʼkidlaydi;
yangi koronavirus dorilari, ayniqsa samarali antiviral preparatlar past va oʻrta daromadli mamlakatlarga yetib bormayapti, shuning uchun JSST mamlakatlarni ularni yanada qulayroq qilishga chaqirmoqda;
pandemiyaning har bir toʻlqini kasallik oqibatlari bilan yashaydigan koʻproq odamlarni qoldiradi. Bu omon qolganlarning oʻziga taʼsir qiladi hamda sogʻliqni saqlash tizimi, iqtisodiyot va jamiyat uchun qiyinchilik tugʻdiradi.
