Efiopiya Bosh vaziri Abiy Ahmed Moviy Nildagi (Nilning o'ng irmog'i) “Buyuk Uyg'onish” to'g'onini (GERD) qurilish ishlari yakunlangani va to'liq ishga tushirish muddatini e'lon qildi. To'g'on qurilishi Addis-Abeba, Misr va Sudan o'rtasida uzoq vaqtdan beri qarama-qarshilikka sabab bo'ldi.
“Sentabr oyi oxirida yomg'irlar to'xtasa, biz ochilish marosimini o'tkazamiz va men Misr, Sudan va Nil daryosi havzasidagi barcha boshqa mamlakatlarni parlament orqali unga taklif qilmoqchiman”, deya payshanba kuni Efiopiyaning The Reporter nashri parlamentga qilingan murojaatdan parcha keltiradi.
Moviy Nildagi GERD to'g'onining qurilishi 2011-yilda boshlangan. Mutaxassislarning fikricha, uning qurilishiga 5 milliard dollarga yaqin mablag' sarflangan. Misr va Sudan xavotir bildirdi, chunki to'g'on ularning suv ta'minotiga ta'sir qiladi: Misr o'zining chuchuk suvining taxminan 90 foizini Nildan oladi va oqimdagi har qanday o'zgarishlar mamlakat uchun strategik xavf tug'diradi.
Efiopiya, Misr va Sudan o'rtasidagi ko'p tomonlama muzokaralar dastlab texnik darajada, so'ngra davlat rahbarlari va xalqaro vositachilar, jumladan Afrika Ittifoqi, AQSh va Jahon banki ishtirokida o'tkazildi. Biroq shu kungacha kelishuvga erishilmagan, deb xabar beradi interfax.ru.
