Prezidentimiz MDH Davlat rahbarlari kengashining Dushanbe shahrida boʻlib oʻtgan yigʻilishidagi nutqida ana shu haqiqatni yana bir bor eslatib, ilm-fan, taʼlim, madaniyat va sanʼat bizni birlashtiradigan, kelajak sari yetaklaydigan eng mustahkam poydevor ekanini taʼkidladi.
Davlatlar oʻrtasidagi iqtisodiy sheriklik, siyosiy barqarorlik yoki xavfsizlik tizimlari — bularning bari inson tafakkuri, bilimi, oʻzaro ishonch va madaniyat mahsulidir. Shu bois, Prezidentimiz taʼlim sohasidagi hamkorlikni yangi bosqichga koʻtarish zarurligini qayd etib, diplomlar, malaka va akademik dasturlarni oʻzaro tan olish, professional standartlarni uygʻunlashtirish, yoshlarning ijodiy hamda intellektual salohiyatini qoʻllab-quvvatlash kabi muhim tashabbuslarni ilgari surdi. Yigʻilishda Prezidentimiz tomonidan transport, iqtisodiyot, energetika, raqamli texnologiyalar, xavfsizlik, fan, taʼlim va madaniyat kabi sohalarda qator tashabbuslar oʻrtaga tashlandi. Ayniqsa, taʼlim sohasi boʻyicha ilgari surilgan takliflar alohida ahamiyat kasb etadi.
Sohadagi islohotlar natijasida diplomlar, malaka va akademik dasturlarni oʻzaro tan olish jarayonida oʻzgarishlar boʻladi. Talaba va mutaxassislarning nafaqat mamlakatimiz, balki xalqaro yoki mintaqaviy mehnat bozorlarida erkin harakatlanishi, ishga joylashishi va yuqori taʼlim olish imkoniyati kengayadi. Shuningdek, professional standartlarni uygʻunlashtirish boʻyicha ishlar taʼlim sifatini oshirish va mehnat bozorida raqobatbardosh kadrlar tayyorlashga xizmat qiladi. Bu esa mamlakatimizning barqaror rivojlanishiga zamin yaratadi. Umuman olganda, islohotlar taʼlim tizimini yangi bosqichga koʻtarib, ijtimoiy va iqtisodiy sohalarda sezilarli ijobiy oʻzgarishlarga sabab boʻladi.
Bular shunchaki gap emas, balki kelajak avlod uchun ochilgan yangi ufqdir. Chunki har bir yoshning bilimga intilishi, ilmga sadoqati butun jamiyat taraqqiyotini belgilaydi. Prezidentimizning Yoshlar laboratoriyasini yaratish gʻoyasi yosh iqtidor egalari uchun ilhom manbai, ularning orzularini amaliy loyihalarga aylantirish maydoni boʻladi.
Salkam bir asrlik tarixga ega boʻlgan, ilm va maʼrifat maskani — Fargʻona davlat universitetida anʼanaga aylangan, iliq va samimiy ruhda oʻtayotgan “Rektor va yoshlar” uchrashuvida talabalar bilan dildan suhbatlashar ekanman, ularning har bir nigohida ishonch, har bir soʻzida umid va fidoyilikni koʻrdim. Ayniqsa, chet tillar fakultetining birinchi bosqichida tahsil olayotgan ochiq fikrli, tashabbuskor va izlanuvchan yoshlar xalqaro forum tashkil etish niyatida ekanini bildirgani juda maʼqul boʻldi. Nega deganda, bu tashabbus zamirida nafaqat ulkan masʼuliyat, balki orzu, qatʼiyat va vatan oldidagi sadoqat mujassam. Prezidentimizning Dushanbe yigʻilishida Xiva shahrida MDH Yoshlar forumi tashkil etish tashabbusi xalqlarimiz oʻrtasidagi doʻstlik, maʼnaviy yaqinlik ramzidir. Zero, yoshlar birlashsa, kelajak birlashadi.
Bugun dunyo raqamli texnologiyalar, sunʼiy intellekt, innovatsion iqtisodiyot sari borayotgan bir paytda taʼlim tizimi ham yangicha fikrlash, yangicha yondashuvni talab qiladi. Prezidentimizning raqamli hamkorlikni kuchaytirish haqidagi chaqirigʻi aynan shunga yoʻnaltirilgan: bilim almashish, tajriba oʻrganish, oʻzaro oʻqitish orqali bir-birimizni boyitish, hamfikr boʻlish. Shunday ekan, bugun har bir oʻqituvchi, har bir talaba, har bir ota-ona bu chaqiriqni yurakdan his etishi kerak: taʼlim eng katta sarmoya, eng ishonchli kafolat, eng goʻzal merosdir.
Prezidentimiz aytganidek, taʼlim va ilm- fan sohasida qoʻshma dasturlarni kengaytirish, malaka mezonlarini uygʻunlashtirish, yoshlarning intellektual kuchini birlashtirish nafaqat MDH doirasidagi hamkorlikni mustahkamlaydi, balki butun mintaqa kelajagini nurafshon etadi. Zero, bilim bilan birlashgan xalqlarni hech qanday toʻsiq yenga olmaydi. Ilm bilan rivojlangan jamiyatni hech qanday kuch toʻxtatishga qodir emas. Tafakkur bilan yuksalayotgan avlodni esa faqat yorqin kelajak kutadi.
Bahodirjon ShERMUHAMMADOV,
pedagogika fanlari doktori, professor
