Giyohvandlik vositalarining noqonuniy aylanmasiga qarshi kurashish doirasida Davlat xavfsizlik xizmatining Farg‘ona viloyati bo‘yicha boshqarmasi xodimlari tomonidan Bojxona va ichki ishlar organlari bilan hamkorlikda tezkor tadbir o‘tkazildi.

Tadbir davomida Qo‘qon shahrida yashovchi, 2002 yilda tug‘ilgan fuqaro boshqaruvidagi Chevrolet Cobalt Uchkuprik tumani hududida tekshirilgan.

Tekshiruv natijasida avtomashina salonidan 4 kilogramm 41 gramm «gashish» moddasi topilgan. Shuningdek, mazkur fuqaroning yashash manzilidan ham 867 gramm «gashish» musodara qilingan.

Tergovga qadar tekshiruv davomida ushbu giyohvandlik vositalari uning 1980 yilda tug‘ilgan tog‘asiga tegishli ekani aniqlanib, u ham qo‘lga olingan.

Ma’lum qilinishicha, giyohvandlik vositalari qo‘shni respublikadan noqonuniy olib kirilgan.

Hozirda mazkur shaxslarga nisbatan O‘zbekiston Respublikasi Jinoyat kodeksining 246-moddasi (kontrabanda) hamda 273-moddasi (giyohvandlik vositalari, ularning analoglari yoki psixotrop moddalarni o‘tkazish maqsadida tayyorlash, saqlash va boshqalar) bilan jinoyat ishi qo‘zg‘atilgan.

Ularga nisbatan «qamoq» ehtiyot chorasi qo‘llanib, tergov harakatlari olib borilmoqda.

Fuqarolardan giyohvandlik vositalari savdosi bilan bog‘liq holatlar haqida Davlat xavfsizlik xizmatining 1520 qisqa raqami orqali xabar berish so‘raldi. Shaxs sir saqlanishi kafolatlanishi bildirilgan.