Oʻzbekiston Respublikasi Prezidentining farmonlari va qarorlari, Oʻzbekiston Respublikasi Vazirlar Mahkamasining qarorlari, vazirliklar va idoralarning buyruqlari hamda qarorlari, mahalliy davlat hokimiyati organlarining qarorlari qonunosti hujjatlaridir.
Oʻzbekiston Respublikasi Konstitutsiyasining 30-moddasiga koʻra hech kim rasmiy eʼlon qilinmagan qonun asosida hukm qilinishi, jazoga tortilishi, mol-mulkidan yoki biron-bir huquqidan mahrum etilishi mumkin emas.
Qonun hujjatlarini rasmiy eʼlon qilish bu — “Normativ-huquqiy hujjatlar toʻgʻrisida”gi Oʻzbekiston Respublikasi qonunining 39-moddasida roʻyxati keltirilgan manbalarda belgilangan tartibda axborot tarqatish usulidir.
Shuningdek “Normativ-huquqiy hujjatlar toʻgʻrisida”gi Oʻzbekiston Respublikasi Qonunining 38-moddasida belgilangan tartibga koʻra normativ-huquqiy hujjatlarning eʼlon qilinishi ular qoʻllanilishining majburiy shartidir. Ushbu qonundagi bunday talabning mavjudligi Oʻzbekiston Respublikasi Konstitutsiyasida belgilangan Konstitutsiya va qonunning ustunligi prinsipini amalda qoʻllanishini taʼminlashning bir usulidir.
Yuqorida keltirilgan asoslarga koʻra Oʻzbekiston Respublikasining har bir fuqarosiga eʼlon qilinmagan har qanday turdagi normativ-huquqiy hujjatlar asosida majburiyatlar yuklatilishi mumkin emasligi aniqlashadi. Demak, har qanday eʼlon qilinmagan umummajburiy davlat koʻrsatmalarini aks ettirgan va fuqarolarga qoʻshimcha talablar, majburiyatlar va ortiqcha toʻlovlarni yoki harakatlarni belgilovchi hujjatlar Konstitutsiya va “Normativ-huquqiy hujjatlar toʻgʻrisida”gi Oʻzbekiston Respublikasi qonuniga ziddir va fuqarolar shu turdagi hujjatlarda belgilangan talablarni bajarmaslikka haqlidirlar.
