Hafta oʻrtasida Oʻzbekiston hududiga iliq havo kirib kelishi kutilmoqda

Yashil sayyora 21 noy 2022, 13:21 1 251

Respublika Gidrometeorologiya xizmati markazi 21-25-noyabr kunlari kuzatiladigan haftalik ob-havo maʼlumotini eʼlon qildi.

Bugun Oʻzbekiston boʻyicha kam bulutli va quruq ob-havo boʻlishi kutilmoqda, faqat Navoiy viloyatining shimoliy hududlarida, shuningdek, Toshkent viloyatining baʼzi joylarida frontal bulutli chiziqlar oʻtishida biroz yomgʻir yogʻishi mumkin, togʻli hududlarda yogʻingarchilik (yomgʻir, qor) boʻladi.

Kunduzi havo harorati 13-15^o iliq, janubda 18-21^o iliq atrofida boʻladi.

Seshanba kunidan boshlab va ish haftasining oxirigacha Oʻzbekiston hududiga Eron hududlaridan quruq va juda iliq havo kirib kelishi kutilmoqda. Harorat foni 6-8^o ga koʻtariladi. Kunduzi havo harorati seshanba kuni – 15-17^o iliqgacha, soʻng esa 18-20^o iliqgacha, baʼzi joylarda 23^o iliqgacha koʻtariladi.

Respublika boʻyicha yogʻingarchilik kutilmaydi, faqat Toshkent viloyatining ayrim joylarida seshanbaga oʻtar kechasi biroz yomgʻir yogʻishi mumkin, togʻlarda yogʻingarchilik boʻladi.

21-22-noyabrda respublikaning togʻli hududlarida qor koʻchishi xavfi bor.

Bugun va ertaga respublikaning ayrim joylarida shamol 15-20 m/s gacha kuchayishi kutilmoqda.

Respublika boʻyicha baʼzi joylarga tuman tushishi mumkin.