Imom Buxoriy majmuasi 2026 yil 19 mart kuni O‘zbekiston Respublikasi Prezidenti Shavkat Mirziyoyev ishtirokida tantanali ravishda ochilgan edi. Keng ko‘lamli rekonstruktsiya ishlari natijasida majmua zamonaviy va milliy me’morchilik an’analariga uyg‘un qiyofa kasb etdi.

Bugungi kunda majmua hududi 45 gektarni tashkil etadi. Uning tarkibida Imom Buxoriy hazratlarining saganasi, 10 ming kishilik masjid, 154 ustunli milliy uslubdagi ayvonlar, 14 ta moviy gumbaz, 75 metrlik 4 ta minora hamda 9 pavilondan iborat innovatsion muzey faoliyat yuritmoqda. Muzeyda buyuk allomaning hayoti, ilmiy merosi va islom olamidagi o‘rni keng yoritilgan.

Majmua nafaqat ziyorat maskani, balki xalqimizning boy ma’naviy merosi, milliy me’morchilik an’analari va islom tsivilizatsiyasidagi munosib o‘rnini namoyon etuvchi muhim madaniy obyekt hisoblanadi. Uni bunyod etish jarayonida katta mablag‘, xorijdan olib kelingan qimmatbaho marmarlar, noyob qurilish materiallari va zamonaviy texnologiyalar jalb etilgan.

Shu bois ushbu qutlug‘ maskanga tashrif buyurayotgan fuqarolardan ziyoratgoh madaniyatiga rioya qilish, hududdagi tozalik va tartibni saqlash, binolar, ustunlar, ayvonlar, muzey ekspozitsiyalari hamda boshqa obyektlarga ehtiyotkorlik bilan munosabatda bo‘lish so‘ralmoqda.

Afsuski, ayrim holatlarda ba’zi tashrif buyuruvchilar tomonidan majmua hududidagi qimmatbaho materiallar va inshootlarga nisbatan bepisand munosabat holatlari kuzatilayotgani qayd etildi. Mutasaddilar bunday hatti-harakatlar majmuaning tashqi ko‘rinishi va uning uzoq yillar davomida asl holicha saqlanishiga salbiy ta’sir ko‘rsatishi mumkinligini ta’kidladi.

Mas’ullar barcha fuqarolar va ziyoratchilarni ushbu muqaddas maskanga hurmat bilan munosabatda bo‘lishga, tozalik va ozodalikka amal qilishga hamda majmuani kelajak avlodlarga munosib holatda yetkazish yo‘lida mas’uliyat bilan yondashishga chaqirdi.