Taʼkidlanishicha, joriy yilning 13-mart kuni Oila va xotin-qizlar qoʻmitasi raisi Parpibayeva Ozoda Nyu-York shahrida Indoneziya ayollar imkoniyatlarini kengaytirish va bolalarni himoya qilish masalalari boʻyicha vazir oʻrinbosari bilan uchrashdi.
Uchrashuvda Islom hamkorlik tashkilotiga (IHT) aʼzo davlatlarning tegishli idoralari hamda jamiyatlari ishtirokida xotin-kizlarning jamiyat hayoti va davlat boshqaruvidagi oʻrnini kuchaytirish boʻyicha Oila va xotin-qizlar qoʻmitasi oʻrtasida oʻzaro Anglashuv memorandumini imzolash hamda 12-14-mart kunlari “Osiyo ayollar forumi”ga ishtirok etish masalasi muhokama qilindi.
Oila va xotin-qizlar qoʻmitasi hamda Indoneziya ayollar imkoniyatlarini kengaytirish va bolalarni himoya qilish vazirligi oʻrtasidagi quyidagi yoʻnalishlar bilan hamkorlik yoʻlga qoʻyiladi:
- ilmiy-texnikaviy, ijtimoiy-madaniy, iqtisodiy, taʼlim, gumanitar, turizm va tomonlarni qiziqtirgan boshqa sohalardagi hamkorlikni mustahkamlash va rivojlantirishga koʻmaklashish;
- xotin-qizlarning jamiyatdagi huquqlari, manfaatlari va qadr-qimmatini himoya qilish, ularning ijtimoiy-siyosiy va madaniy hayotdagi rolini oshirishga koʻmaklashish;
- milliy anʼanalarni asrab-avaylash, oila institutini mustahkamlash, xotin-qizlar tadbirkorligini rivojlantirish;
- xalqaro va mintaqaviy tashkilotlarning tadbirlari hamda forumlari doirasida oʻzaro manfaatli masalalarni muhokama qilishda muntazam uchrashuvlar oʻtkazish, bir-birini qoʻllab-quvvatlash va yordam koʻrsatish kabi masalalarda hamkorlik oʻrnatish boʻyicha kelishildi.