Qarorga koʻra, 2025-yilda xalqaro moliya institutlari va xorijiy hukumat moliya tashkilotlari (XMI/XHMT) ishtirokidagi loyihalarni amalga oshirish boʻyicha quyidagi maqsadli koʻrsatkichlar belgilandi:
- davlat kafolati ostida jalb qilinadigan kreditlar hisobidan belgilangan miqdoridagi mablagʻlarni oʻzlashtirish;
- kafolatlanmagan kreditlar hisobidan belgilangan miqdoridagi mablagʻlarni oʻzlashtirish;
- belgilangan miqdoridagi istiqbolli investitsiya loyihalarini amalga oshirish imkoniyatlarini oʻrganish.
Mazkur maqsadli koʻrsatkichlarga erishishni taʼminlash uchun xalqaro XMI/XHMT ishtirokidagi investitsiya loyihalari bilan ishlash boʻyicha Favqulodda shtab va uning hududiy shtablari tashkil etiladi.
XMI/XHMT ishtirokidagi loyihalarni amalga oshirish guruhlarini tuzish amaliyoti 2025-yil 1-martdan bosqichma-bosqich tugatiladi va barcha funksiyalari Loyihani ijro etuvchi agentliklarning tegishli boʻlinmalariga yuklatiladi.
2025-yil 1-iyungacha “Investitsiya loyihalarini amalga oshirishni nazorat va monitoring qilish” avtomatlashtirilgan axborot tizimi ekspertizadan oʻtkazilib, XMI/XHMT tomonidan moliyalashtiriladigan loyihalar doirasida elektron xaridlarni amalga oshirish boʻyicha maxsus axborot portali ishga tushiriladi hamda raqamli xarid tartib-qoidalariga oʻtiladi.
