Aytish joizki, mazkur tashabbus vazirlik boshqarma boshliqlari tomonidan bildirilgan boʻlib, maqsad xalq bilan yanada yaqindan aloqa qilish hamda murojaatlarga huquqiy tushuntirish va maslahatlar berishdan iborat. Ertalab soat 9:00 dan 18:00 gacha boʻlgan vaqtda fuqarolarning murojaatlari jonli muloqot davomida qabul qilindi, eshitildi, huquqiy tushuntirish va maslahatlar berildi.
“Call center” orqali masʼul xodimlar tomonidan 600 dan ortiq murojaatlarga huquqiy tushuntirishlar berilgan boʻlib, shundan 60 ta murojaat oʻrganish talab etilganligi sababli vazirlik elektron tizimi orqali qabul qilinib, ijroga qaratildi.
Maʼlumot uchun: kun davomida vazirlik ishonch telefoni orqali jismoniy va yuridik shaxslar tomonidan eng koʻp quyidagi murojaatlar kelib tushgan:
-
- mehnat nizolariga oid: ish haqini oʻz vaqtida va toʻliq toʻlanmayotganligi, mehnat shartnomasini qonunga zid ravishda bekor qilish, ishsiz shaxs sifatida roʻyxatga olish va ishsizlik nafaqasini toʻlash yuzasidan;
- kam taʼminlangan oilalarga ijtimoiy nafaqalar va moddiy yordam tayinlash hamda toʻlash bilan bogʻliq;
- Davlat xizmatlari agentligi tizimi faoliyatiga oid: FHDY organlarida tegishli guvohnomalarni olishdagi muammolar, fuqarolarning FHDY organi xodimlari xatti-harakatlaridan noroziligi bilan bogʻliq;
- tadbirkorlik faoliyatini olib borishdagi toʻsiqlar: bankdan kredit olish hamda tadbirkorlik faoliyati uchun yer ajratilishidagi muammolar;
- elektr energiyasi taʼminotida yuzaga kelayotgan muammolar: elektr energiyasi uchun qilingan toʻlov hisobga olinmayotganligi, elektr energiyasini uzatuvchi moslamalarning nosozligi va boshqa masalalar boʻyicha.
Ushbu loyiha amaliyotda fuqarolarni qiynab kelayotgan koʻplab muammolar mavjudligini, har bir davlat organi fuqarolarni murojaatlari bilan ishlashda yana ham jiddiy yondashish kerakligini anglatadi deyish mumkin. Zero fuqarolar davlat organlariga emas, balki davlat organlari fuqarolarga xizmat qilishi lozim, deb xabar beradi Adliya vazirligi jamoatchilik bilan aloqalar boʻlimi.
