Kollej va texnikumlarga kirish test sinovlari qachon oʻtishi maʼlum boʻldi

    Test sinovi kasb va mutaxassislikka mos 2 ta fan va barcha test topshiruvchilar uchun majburiy boʻlgan 3 ta fandan oʻtkaziladi.

    2022-2023-oʻquv yili uchun professional taʼlim muassasalari (kollej va texnikum)ga kirish test sinovlari 3-oktyabrdan 8-oktyabrga qadar 2 smenada oʻtkaziladi. Bunda test sinovlari:

    1 smenada 09:00 dan 12:00 gacha;
    2 smenada 14:30 dan 17:30 gacha boʻlib oʻtadi.

    Test sinovi kasb va mutaxassislikka mos 2 ta fan va barcha test topshiruvchilar uchun majburiy boʻlgan 3 ta fandan oʻtkaziladi.

    Barcha test topshiruvchilar uchun majburiy fanlar quyidagilar:
    — ona tili;
    — matematika;
    — Oʻzbekiston tarixi.

    Talabgorlarga mutaxassislik fanlaridan 30 tadan, majburiy fanlardan 10 tadan jami 90 ta test topshirigʻi beriladi.

    Testlarni yechish uchun 3 soat vaqt ajratiladi.

    Test sinovlarida toʻplash mumkin boʻlgan maksimal ball – 189 ball boʻlib, har bir toʻgʻri javob uchun:

    — 1-mutaxassislik fanida — 3,1 balldan (jami 93 ball);
    — 2-mutaxassislik fanida — 2,1 balldan (jami 63 ball);
    — majburiy fanlarda — 1,1 balldan (jami 33 ball) beriladi.

    Talabgorlar ruxsatnomani DTMning my.dtm.uz saytidan yuklab olishlari mumkin.

    Talabgorlar test sinovi oʻtkaziladigan hududga belgilangan vaqtdan kamida 1 soat oldin shaxsini tasdiqlovchi hujjat va tegishli ruxsatnoma bilan kelishlari lozim.