Tomonlar diqqat markazida qoʻshma loyihalarni amalga oshirish va qayta tiklanuvchi energiya manbalarini rivojlantirish boʻyicha sarmoyaviy hamkorlikni yanada kengaytirish masalalarining muhokamasi boʻldi.
Xususan, Samarqand, Jizzax va Surxondaryo viloyatlarida umumiy quvvati 897 MVt boʻlgan 3 ta fotoelektr stansiyasini qurish loyihalarini hayotga tatbiq etishning bugungi holati muhokama etildi. Mazkur investitsiya loyihalari qurilishini joriy yil aprel oyida boshlash boʻyicha kelishuvga erishildi.
Yangi yirik investitsiyaviy loyihalarni amalga oshirish orqali kompaniyaning Oʻzbekistondagi faoliyatini kengaytirish istiqbollari yuzasidan ham fikr almashildi, deb xabar beradi Investitsiyalar, sanoat va savdo vazirligi matbuot xizmati.
Maʼlumot uchun: “Masdar” qayta tiklanuvchi energiya manbalari va shaharlarning barqaror rivojlanishi yoʻnalishiga ixtisoslashgan kompaniya hisoblanadi. Kompaniya Abu-Dabi (BAA) hukumatiga tegishli boʻlgan Mubadala global investitsiya kompaniyasi tarkibiga kiradi. Kompaniya dunyoning turli mamlakatlarida qayta tiklanadigan energiya sohasida yirik va strategik loyihalarni amalga oshiradi. U 2006-yilda Abu-Dabida (BAA) tashkil etilgan. Kompaniya 30 ta davlatda investitsiya loyihalarini amalga oshiradi, loyihalarning umumiy qiymati 19,9 milliard dollardan oshadi.
