Moskva viloyatidagi xostelda yuz bergan yongʻinda oʻzbekistonliklar halok boʻldi

    Shu yilning 23-mayga oʻtar kechasi Moskva viloyati, Istra shahri, Padikovo qishlogʻidagi yotoqxonada yongʻin sodir boʻlib, unda Oʻzbekiston fuqarolari halok boʻldi, deb xabar bermoqda “Dunyo” AA.

    Oʻzbekistonning Moskvadagi elchixonasi Konsullik boʻlimi maʼlumotlariga koʻra, yonib ketgan uyda 20 ga yaqin xorijliklar yashagan, ulardan 11 nafari Oʻzbekiston fuqarolari boʻlgan.

    Yongʻin oqibatida 8 nafar kishi halok boʻlgan, hozirda ularning shaxsi aniqlanmoqda. Halok boʻlganlar orasida Oʻzbekiston fuqarolari ham bor. Yogʻin oqibatida vafot etganlarning shaxsini aniqlash uchun Istra shahar sud-tibbiyot ekspertizasi byurosi tomonidan oʻrganishlar olib borilmoqda.

    Mazkur ish boʻyicha tergov organi tomonidan Rossiya Jinoyat kodeksining 109-moddasi (ehtiyotsizlik oqibatida oʻlimga sabab boʻlish) bilan jinoyat ishi qoʻzgʻatilgan.

    Vaziyat elchixonaning Konsullik boʻlimi va Tashqi mehnat migratsiyasi agentligining Moskvadagi vakolatxonasi nazoratida ostida.