Huquqni muhofoza qiluvchi organlar maʼlumotiga ko‘ra, operatsiyalar natijasida 2 nafar guruh yetakchisi va 35 nafar aʼzo qo‘lga olingan.

Shuningdek, bir oy davomida 4 ta yashirin narkolaboratoriya va 1 ta internet orqali faoliyat yuritgan narkodo‘kon rahbari fosh etildi. Tojikiston bilan hamkorlikda xalqaro darajadagi tezkor tadbir ham o‘tkazilgan.

Tergov maʼlumotlariga ko‘ra, qo‘lga olingan jinoyiy guruhlar respublikadagi 50 ta tuman va shahar aholisi orasida narkotik moddalar tarqatib kelgan.

Tezkor tadbirlar davomida ushbu gurlardan 285 kilogramm anʼanaviy narkotik moddalar, bu taxminan 855 ming dozaga teng ekani, shuningdek, 410 ming dona psixotrop dori vositalari va narkotik tayyorlash uchun mo‘ljallangan 42 litr noqonuniy prekursorlar musodara qilingan.

Qayd etilishicha, ushbu jinoyiy tarmoqlar orqali bir yilda o‘rtacha 2,6 million dona psixotrop dori vositalari, 1,4 tonna «gashish» va «opiy» hamda 500 kilogramm sintetik narkotik moddalar tarqatilishining oldi olingan.

Huquqni muhofoza qiluvchi organlar narkojinoyatlarga qarshi kurash ishlari qatʼiy davom ettirilishini bildirdi.