Maʼlumki, 2024-2025-oʻquv yilida oliy va professional taʼlim muassasalariga oʻqishga kirish test sinovlari 14-iyuldan boshlanadi.
Test sinovlari kuniga 2 smenada tashkil etiladi. 1-smena soat 08:00 da, 2-smena 15:00 da boshlanadi. Abituriyentlardan test sinovlari boshlanishidan kamida bir yarim soat oldin belgilangan hududga yetib kelishlari talab etiladi.
Test sinovlarida ishtirok etish uchun onlayn roʻyxatdan oʻtgan abituriyentlarga “Abituriyent ruxsatnomasi” my.uzbmb.uz sayti orqali berilmoqda.
Test sinovlari boshlanishiga sanoqli kunlar qolgani bois abituriyentlardan oʻzlariga tegishli “Abituriyent ruxsatnomasi”ni yuklab olishlarini hamda chop etib qoʻyishlari soʻraldi.
Abituriyentlar ruxsatnomada belgilangan manzildagi binoda, koʻrsatilgan sanada va smenada test sinovlarida ishtirok etadi. Abituriyentlarga boshqa hudud, kun va smenada test sinovlarida ishtirok etishga ruxsat etilmaydi.
Abituriyentlar test sinoviga pasport (ID-karta) va abituriyent ruxsatnomasi bilan belgilangan vaqtdan kechikmagan holda kelishlari lozim.
Pasport nusxasi yoki boshqa hujjatlar bilan kelgan, shuningdek, kechikib kelgan abituriyentlar test sinovlariga kiritilmaydi!
Ertaga, 11-iyul kuni soat 11:00 dan 13:00 ga qadar yoki 14:00 dan 15:00 ga qadar barcha abituriyentlar ruxsatnomalarida koʻrsatilgan manzildagi oʻzlari test sinovida ishtirok etadigan binoga kelib, test sinovi oʻtkaziladigan joylar bilan tanishib ketishlari mumkin.
